Kreu i opozitës shqiptare, asaj të PDSH-së, Menduh Thaçi gjatë iftarit të shtruar për strukturat partiake ka dhënë një deklaratë për media. Sipas tij kriza politike në Maqedoni tani është shumë më e thellë se vitin e kaluar.
“Tani jemi shumë më larg marrëveshjes se sa para 13 muajve. Sinqerisht as vetë nuk e kam të qartë se çka po ndodh më me listën zgjedhore.
Rreth 80 për qind e atyre që kërkohet të fshihen nga lista janë shqiptarë”, deklaroi Thaçi.
Ai bëri të ditur se pushteti bën ofertë për kyçje në qeveri të LSDM-së dhe PDSH-së, por me kusht që të caktohet dita e zgjedhjeve dhe kyçja e opozitës të bëhet 100 ditë para zgjedhjeve.
“Për ne është e papranueshme të formohet qeveri teknike, por vetëm qeveri e koalicionit të gjerë në të cilin raporti i ministrave të BDI-së dhe PDSH-së do të jetë 50 me 50”, theksoi Thaçi.
Megjithatë Thaçi shprehet i bindur se sivjet nuk do të ketë zgjedhje të parakohshme. PDSH, sipas Thaçit kërkon që deri në dhjetor të caktohet data e zgjedhjeve të parakohshme parlamentare, ose të shkohet me zgjedhje të rregullta në vitin 2018. M.K. /tesheshi.com/
