Menduh Thaçi do vijojë të jetë sërish kreu i Partisë Demokratike Shqiptare. Dorëheqja e tij nuk është pranuar nga kryesia e kësaj partie që u mblodh së fundi. Thaçi vetë e ka pranuar si verdikt dhe e ka arsyetuar rikthimin e tij në krye të PDSH-së me vetë situatën politike që po kalon Maqedonia, si dhe me afrimin e sfidës së radhës, zgjedhjet lokale.
“Kam shumë dëshirë të ndeshem me kundërshtarë dhe armiq, por me njerëzit e mi nuk dua të ndeshem. Aspekti është edhe më shumë njerëzor. Të kishim qenë në kontekst tjetër kohor nuk do të kishte forcë që do të më detyronte ta tërheq dorëheqjen. Situata e partisë është e vështirë. Kemi zgjedhjet lokale në prag dhe nuk dua të luaj lojën e disa liderëve tjerë që djegin njerëz, por po djeg veten prapë. Kryetarin tjetër që do ta zgjidhshin rrezikonte që të ballafaqohet ndoshta me rezultat më të dobët në zgjedhjet lokale dhe kjo do të interpretoheshte si amoralitet nga ana ime”, ka deklaruar Thaçi.
Dorëheqja e tij erdhi menjëherë pas rezultateve të zgjedhjeve të 11 dhjetorit, ku PDSH shënoi rekordin negativ të marrjes së vetëm dy mandateve, duke qenë një ndër partitë më të vjetra dhe padyshim historike, në faktorin politik shqiptar të Maqedonisë, themeluar dhe drejtuar për shumë vite nga i ndjeri Arbër Xhaferi.
Me këtë akt, Thaçi shënon një precedent në politikën mbarëshqiptare, çka mund ta nxisë dhe Berishën në Shqipëri të bëjë të njëjtën gjë në PD-në e tij. Ndërsa për Nanon, është e pamundur të ndodh kjo. Kujtojmë që të dy këta të fundit kanë dhënë dorëheqje nga partitë respektive pas humbjes në zgjedhje. /tesheshi.com/
