Nga Mensur Krasniqi
Ka shkaktuar reagime të forta një deklarim i kreut të PDSH-së në Maqedoni, Mendu Thaçi, sipas së cilit, ai është “’Baba’ i opozitës shqiptare”. Kjo u tha prej tij në emisionin Click plus të TV21, ndërkohë që pritshmëria e pjesës më të madhe të opinionit shqiptar është për bashkimin e faktorit opozitar për ta ndalur më në fund me votë dyshen VMRO-BDI.
Sipas sekretarit të përgjithshëm të Lëvizjes për Reforma në PDSH, Arben Taravari, do ishte më mirë që Thaçi të bënte gjyshin në shtëpinë e tij sesa “babain” në politikën opozitare.
“Mendoj që tashmë z.Thaçi është në pragun e gjyshërimit. Për këtë shkak nuk do të zgjatem më tepër në gjykim. Uroj që ankthin e tmerrshëm që të shkakton jeta politike, t’ia largojë jeta e qetë me nipërit e mbesat”, ishte konciz për portalin tesheshi.com, Arben Taravari.
Ironia në adresë të kreut të PDSH-së Menduh Thaqi, ka vazhduar edhe me një status në rrjetin social Facebook të anëtarit të Kryesisë Qendrore të Lëvizjes Besa, Adnan Azizit i cili pyet: Cili është “bossi” që i ka të larë duart me gjakun e bashkëluftëtarëve dhe “baba” që është “veren do smrt”?
Por “selamin”(mesazhin), më të mirë Menduh Thaqit i’a ka përcjellë analisti politik, Ramadan Ramadani. Duke aluduar në deklaratën e mbrëmshme të Menduh Thaçit, Ramadani në profilin e tij në facebook ka shkruar: “Opozita shqiptare duhet ta thojë shkurt dhe qartë: shumë njerit që ka dash të dihet si “babë”, shqiptarët ja kanë lujt at nanë #dosmrt!”.
Ndërsa për opinionistin Emad Mehmeti, Menduh Thaçi dhe Ali Ahmeti mund të jenë “bossa” dhe “baballarë” vetëm të atyre që i kanë bërë ministra.
“Shqiptarët nuk kanë nevojë për ‘baba’ dhe ‘bossa’. Ali Ahmeti dhe Menduh Thaçi u përpoqën të bëhen pronarë edhe të fëmijëve tanë ngaqë deshtën ta instalojnë mendësinë e rrezikshme se atë që s’mund të ta ofrojë as familja, ta ofron partia! Mjafton që ata t’i ndjesh si ‘boss’ e ‘babë’ dhe mund të bëhesh edhe ministër. Ne nuk kemi fëmijë për ata që i kanë të lara duart me gjak shqiptari, krim, korrupsion, etj! Për ata që janë “veren do smrt”, dhe më shumë se kaq!”, shkruan Emad Mehmeti. /tesheshi.com/
