Drejtues të PDK-së vazhdojnë të deklarojnë se koalicioni PAN do të formojë qeverinë e re, edhe pse asnjë prej tyre nuk është në gjendje të thotë se si do i bëjnë votat, pasi rezultatin zgjedhor tregon se koalicioni në fjalë nuk i ka ato të mjaftueshme që bashkë me minoritetet t’i formojë institucionet e reja qendrore.
Është nënkryetari i PDK-së, Memli Krasniqi, zyrtari i radhës që thotë se everia e re do të mbështetet nga deputetë që, siç ka thënë ai, kanë vullnet t’i bashkohen vizionit të tyre dhe vullnetit të shprehur qytetar për një lidership të fuqishëm, i cili kryen punë dhe merr vendime të mëdha dhe të nevojshme për vendin.
Por ai nuk është në gjendje të thotë asnjë emër se cilët deputetë do japin votën “pro” Haradinajt, kur kihet parasysh fakti se LDK dhe aletatët e saj mbesin aktualisht të palëkundur se nuk e votojnë PAN-in, gjë që e tha së fundmi një gjë të tillë edhe deputetja më e votuar e LDK-së, Vjosa Osmani.
Nënkryetari Krasniqi, në një intervistë për gazetën “Zëri” ka folur edhe për rënien drastike të partisë së tij në zgjedhjet e fundit, për çka ka mbrojtur kryetarin Veseli duke thënë se ai ka udhëhequr koalicionin fitues dhe nuk ka arsye të japë dorëheqje.
“Andaj lidershipi i tij është i pakontestueshëm. Si PDK ne e kemi kuptuar drejt mesazhin e votueseve tanë tradicionalë dhe të tjerëve dhe në këtë kuadër do t’i bëjmë analizat e nevojshme për vazhdimin e rrugës së reformave të nevojshme për fazën e ardhshme, qoftë në institucionet e vendit, qoftë brenda strukturave partiake”, ka thënë Krasniqi. /tesheshi.com/
