Nga disa migrime legale mund të përfitojnë ekonomitë evropiane, por migrimi nuk është zgjidhja për krizën demografike të Evropës, tha kryeministrja italiane Giorgia Meloni.
Ky pohim i saj u bë në një samit demografik në Budapest, organizuar nga kryeministri hungarez Viktor Orbán, një mik i vjetër politik i Melonit.
“Mendoj se kuota e migracionit të ligjshëm… jep një kontribut pozitiv për ekonomitë tona, por gjithsesi jam e bindur se do të ishte më e përgjegjshme t’u besohej qytetarëve evropianë një zgjidhje për krizën e sistemit evropian të mbrojtjes sociale”, tha Meloni.
Koalicioni i Giorgia Melonit, i cili erdhi në pushtet vitin e kaluar, ka shtyrë një axhendë nacionaliste që përfshin një qasje të ashpër ndaj migrimit, premtime për stimuj për normën e ulët të lindjeve në Itali, ligje kundër prindërimit LGBT dhe kundër përdorimit të fjalëve të huaja në dokumentet zyrtare.
“Ne jetojmë në një epokë ku gjithçka që na përcakton është nën sulm,” tha Meloni, duke shtuar se mbrojtja e modelit tradicional të familjes dhe Zotit është pjesë e një “beteje të madhe” për të mbrojtur njerëzimin dhe të drejtat e njerëzve. /tesheshi.com/
