Kryeministrja italiane Giorgia Meloni, gjatë një takimi me kryeministrin kinez Li Qianq në samitin e grupit të vendeve të G20, tregoi planin e Romës për t’u tërhequr nga nisma e Kinës “Belt and Road”.
Italia dëshiron të zvogëlojë reagimin negativ të Pekinit dhe do të përpiqet të rinovojë marrëveshjen për partneritet strategjik me Kinën, të cilën e nënshkroi fillimisht në vitin 2004 dhe qëllimi i së cilës është të inkurajojë bashkëpunimin ekonomik.
Italia është i vetmi vend anëtar i G7 që ka nënshkruar Iniciativën “Brez dhe Rrugë”, një plan global tregtar dhe infrastrukturor i bazuar në Rrugën e lashtë të Mëndafshit, që lidhte Perandorinë Kineze me Perëndimin.
“Kryeministrja Meloni i përcolli homologut të saj kinez synimin e saj për të braktisur projektin,” raportoi gazeta Corriere della Sera, duke shtuar se Li u përpoq të bindte Melonin të rishikonte vendimin.
Politikanët italianë po vënë në pikëpyetje vlerën e nismës “Belt and Road”, e nënshkruar nga qeveria e mëparshme në vitin 2019, një burim fërkimi me aleatët perëndimorë mbi shqetësimet për zgjerimin e ndikimit kinez.
Italianët u thanë kinezëve se vendimi i tyre nuk ishte imponuar nga Shtetet e Bashkuara, shtoi gazeta.
Italia do të kryesojë grupin G7 vitin e ardhshëm dhe ndryshimi në marrëdhëniet e saj me Pekinin duhet të sigurojë aleatët e saj perëndimorë.
Meloni dhe Li diskutuan për përmirësimin e marrëdhënieve në samitin e G20 në New Delhi, tha zyra e Kryeministrit në një deklaratë.
“Italia dhe Kina ndajnë një Partneritet Strategjik Global, 20-vjetori i të cilit është vitin e ardhshëm dhe që do të jetë një shenjë e avancimit të miqësisë dhe bashkëpunimit në çdo fushë me interes të përbashkët”, thuhet në deklaratë. /tesheshi.com/
