Meloni, reagim ndaj opozitës për faturën e (pa)paguar në Shqipëri

Georgia Meloni ka postuar në Twitter incidentin që u bë viral me bashkatdhetarët e saj dhe restorantin në Shqipëri.

Kryeministrja italiane deklaroi në postimin e saj se ndihet e “turpëruar” për faktin se vendi i saj po diskutohet për këtë arsye në pjesën tjetër të botës, ajo shtoi se faturën e ka paguar vetë, pa e cilësuar lëvizjen e saj si “diçka të madhe”, ndërsa shprehu zhgënjimin e saj për reagimin e opozitës në Itali.

“Kur isha në Shqipëri, kryeministri Rama më tregoi historinë e katër italianëve që u larguan nga një restorant lokal pa paguar faturën. Restoratori, pasi pamjet e arratisjes ishin bërë virale, tha se ishte ende i lumtur sepse bashkatdhetarët tanë hanin mirë dhe ishin të lumtur.

U turpërova, sepse Italia që dua të përfaqësoj nuk është një komb për të cilin flitet jashtë për këto gjëra, që nuk respekton punën e të tjerëve. Kështu vendosa t’i kërkoja ambasadorit të shkonte të paguante faturën, të cilën e pagova vetë. Nuk kam bërë asgjë të madhe, në fakt as që e kam përmendur.

Megjithatë, edhe kjo krijoi një reagim në Itali, nga një opozitë që mesa duket preferon një tjetër imazh të Italisë. Më vjen keq sepse shpresoja që të paktën për diçka kaq të parëndësishme të biem dakord të gjithë.” /tesheshi.com/