Nga Lezha, kryeministrja italiane Giorgia Meloni tha se qendrat e pritjes së emigrantëve do të jenë gati duke filluar nga data 1 gusht.
“Do të jenë operative nga 1 gushti 2024. Do ta realizojmë me sukses. Dy muajt e vonesës janë shkaktuar për shkak të terrenit disi të vështirë në Gjadër”, u shpreh Meloni.
Meloni shtoi gjithashtu se marrëveshje me Shqipërinë për emigrantët është një mjet i fuqishëm për të penguar emigrantët që të vijnë në Europë.
“Ne mendojmë se elementi i dobishëm i kësaj marrëveshjeje është se mund të jetë një mjet i fuqishëm për të penguar emigrantët të mbërrijnë në brigjet tona, në brigjet e Evropës. Mund të jetë edhe një instrument për të kundërshtuar trafikun e qenieve njerëzore nga organizatat kriminale, çka përkthehet në një reduktim të kosotove apo shpenzimeve.”
Sa i përket investigimit të RAI 3 mbi qeverinë shqiptare, duke përdorur gjuhën e opozitës me kryefjalë “narkoshtet”, ajo tha se objektivi i vërtetë i goditjes është qeveria italiane.
“Mendoj se arsyeja e vërtetë nuk është që të sulmohet populli shqiptar dhe qeveria shqiptare.
Duhet vlerësuar fakti që për të sulmuar qeverinë italiane goditet apo sulmohet një partner. Këtu nuk po dëmtohet vetëm qeveria italiane, por edhe Italia.
Shtypi italian ka bërë një zgjedhje të saj. Unë shpreh gatishmërinë dhe solidaritetin tim për ta hedhur poshtë këtë përbaltje dhe premtoj që në të ardhmen të jemi më të vëmendshëm ndaj marrëveshjeve që realizojmë. Nuk mund të vëmë në rrezik apo të komprometojmë marrëdhëniet e fqinjësisë”, tha Meloni. /tesheshi.com/
