Edhe një herë tjetër Melburni ka merituar të përshkruhet si qyteti më i banueshëm i botës. E tëra kjo sipas Renditjes Globale të Banueshmërisë 2015 nga Economist Intelligence Unit.
Raporti i përvitshëm rendit 140 qytete, duke u bazuar në më shumë se 30 faktorë. Studimi i specifikon qytetet sipas pesë kategorive kryesore: stabilitetit, kujdesit shëndetësor, kulturës, mjedisit, arsimit dhe infrastrukturës.
Pikët më të mëdha i kanë marrë qytetet me madhësi mesatare në shtetet më të pasura, e me një dendësi popullsie relativisht të ulët. Në dhjetë qytetet më të banueshme, shtatë prej tyre i përkasin Kanadasë dhe Australisë.
I njohur për kafenë e jashtëzakonshme dhe për dashurinë për pemët, Melburni zuri vendin e parë në listë, me 97.5 pikë nga 100 të mundshmet.
Pas Melburnit vijnë Vjena, Vankuveri dhe Toronto, ndërsa mes qendrave kryesore, Tokio u rendit në vend të 15-të, Parisi në të 29-in, Londra e 53-ta, dhe Nju-Jorku në vendin e 55-të.
Sidnei, qyteti më i madh i Australisë, dhe në një garë të vazhdueshme me Melburnin, u rendit i shtati në listë. Ai mori pikët maksimale në një numër fushash të studimit, por në kategorinë e stabilitetit dhe të mjedisit pati një vlerësim disi më të dobët.
Studimi tregon se banueshmëria mesatare ka rënë me 1% në të gjithë botën që nga viti 2010, ku udhëheq rënia 2.2% në pikët për stabilitetin dhe sigurinë.
Mes qyteteve më pak të banueshme janë renditur Tripoli, Lagosi dhe Damasku, për shkak të konflikteve të vazhdueshme në këto vende. /tesheshi.com/
