Mehmet Kraja, kreu i Akademisë së Shkencave dhe Arteve të Kosovës, tha dëshpërimisht se Serbia është kthyer në Kosovë, referuar faktit se çdo zhvillim ka dhe Serbinë brenda.
“Duhet të jemi të vetëdijshëm për një gjë, Serbia është kthyer në Kosovë në të gjitha diskutimet dhe është e pranishme në çdo pore të politikës. Kjo është gjëja më e keqe që mund t’i ndodhë Kosovës. Ne asgjë nuk bëjmë pa shikuar se çfarë ndodh me Serbinë, pa shikuar se çfarë thotë Serbia, në mëngjes Serbia, në drekë Serbia, në mbrëmje Serbia dhe në njëfarë forme politikat na diktojnë marrëdhëniet me Serbinë”, tha Kraja në një intervistë për REL.
Sipas tij, edhe Marrëveshja e Uashingtonit është joserioze dhe me pasoja për Kosovën.
“Mendoj që kjo që ndodhi në Uashington, nëse çon në drejtim të një marrëveshjeje finale, ka rëndësi. Të tjerat unë i shoh krejtësisht të parëndësishme, krejt i shoh në kuadër të marketingut që i shërbejnë ose Amerikës ose Serbisë, më pak Kosovës, të jeni të sigurt”, tha Kraja, duke shprehur bindjen se as në aspektin ekonomik, Kosova nuk ka ndonjë përfitim.
“Investimet nëse ndodhin, nëse janë të formave të kredive të buta, nuk besoj se kanë shumë peshë për ekonominë e Kosovës, por edhe nëse kanë, mbetet të shihet. Ajo që ka rëndësi është se të gjitha këto marrëveshje duhet të çojnë në drejtim të një përfundimi”, theksoi njeriu që drejton Akademinë e Shkencave të Kosovës. /tesheshi.com/
