Nga Blendi Gashi
Edhe pse ka në dispozicion mbi 100 zv.ministra, për çka kryeministri Ramush Haradinaj ka deklaruar se do arsyetojnë pagat e tyre pasi do ndihmojnë ekzekutivin, qeveria nën drejtimin e tij ka realizuar vetëm 57 për qind e planit të punës për periudhën janar-qershor 2018.
Sipas raportit të Lëvizjes FOL, nga monitorimi i 22 institucioneve, nga 225 aktivitete sa kanë qenë të parapara në Planin Vjetor të Punës së qeverisë për gjashtë muajt e parë të këtij viti, janë realizuar vetëm 130, ndërkaq 95 aktivitete apo 41% kanë mbetur të papërfunduara në afatin e përcaktuar kohor.
Janë vetëm tre Ministri që kanë realizuar të gjitha aktivitetet e parapara, Ministria e Financave, Ministria e Forcës së Sigurisë së Kosovës dhe Ministria për Kthim dhe Komunitete, ndërkaq ministritë të cilat nuk kanë realizuar asnjë aktivitet janë Ministria e Infrastrukturës dhe Ministria e Punëve të Jashtme, kurse për katër aktivitete të Ministrisë së Arsimit, Shkencës dhe Teknologjisë FOL nuk ka marrë përgjigje.
Më poshtë mund të shihni se sa janë realizuar aktivitetet nga secila ministri dhe Zyra e Kryeministrit:
Zyra e Kryeministrit – për periudhën e parë gjashtë mujore kishte paraparë të realizoj 17 aktivitete në kuadër të planit Vjetor, nga të cilat 10 janë realizuar, ndërkaq 7 kanë mbetur të parealizuara.
Ministria e Integrimit Evropian – për periudhën e parë gjashtë mujore ka paraparë 10 aktivitete 7 nga to kanë mbetur të parealizuara.
Ministria e Drejtësisë – nga 19 aktivitete të parapara për periudhën e parë gjashtë mujore ka realizuar vetëm 4 prej tyre.
Ministria e Financave – për periudhën e parë gjashtë mujore ka paraparë 4 aktivitete të cilat janë realizuar në afatin e paraparë.
Ministria e Zhvillimit Ekonomik – nga 6 aktivitete të parapara vetëm një ka mbetur pa realizuar për gjashtë mujorin e parë 2018.
Ministria për Forcën e Sigurisë së Kosovës – ka realizuar 3 aktivitetet e parapara në planin njëvjeçar.
Ministria e Mjedisit dhe Planifikimit Hapësinor – në periudhën e parë gjashtë mujore kishte planifikuar 20 aktivitete dhe kanë mbetur të parealizuara 12 nga to.
Ministria e Administrimit të Pushtetit Lokal – në planin e punës kishte paraparë të realizoj 24 aktivitete nga të cilat i ka mbetur vetëm 1 e parealizuar.
Ministria e Punëve të Brendshme – në periudhën e parë gjashtë mujore ka planifikuar 14 aktivitete ka përfunduar 9, ndërkaq kanë mbetur të pa përfunduara 5 nga to.
Ministria e Punëve të Jashtme – në gjashtë mujorin e parë ka planifikuar 2 aktivitete, të cilat kanë mbetur të parealizuara në afatin e paraparë.
Ministria e Punës dhe Mirëqenies Sociale – ministria në fjalë të gjitha aktivitetet e parapara në planin Vjetor të punës së qeverisë për vitin 2018 ka planifikuar ti realizoj në dhjetor 2018.
Ministria për Komunitete dhe Kthim – ka realizuar të gjitha aktivitetet e parapara për periudhën e parë gjashtë mujore.
Ministria e Shëndetësisë – në kuadër të planit të punës ka realizuar 3 aktivitete, nga 15 sa ishin të parapara.
Ministria e Administratës Publike – ka planifikuar 16 aktivitete, vetëm 3 nga to kanë mbetur të parealizuara për periudhën e parë gjashtë mujore.
Ministria e Kulturës, Rinisë dhe Sportit – ka realizuar 7 aktivitete nga 11 sa kishte planifikuar.
Ministria e Infrastrukturës – ka planifikuar 5 aktivitete në planin e punës të cilat kanë mbetur të papërfunduara sipas afatit të përcaktuar.
Ministria e Bujqësisë, Pylltarisë dhe Zhvillimit Rural –nga 11 aktivitete të planifikuara kanë mbetur të parealizuara 7 nga to.
Ministria e Tregtisë dhe Industrisë – nga 15 aktivitete të parapara, 9 kanë mbetur të parealizuara.
Ministria e Diasporës dhe Investimeve Strategjike – ka përfunduar 12 aktivitete nga 15 sa kishte paraparë në planin Vjetor të punës.
Ministria e Zhvillimit Rajonal – ka realizuar 7 aktivitete nga 8 të parapara për periudhën e parë gjashtë mujore.
Ministria e Inovacionit dhe Ndërmarrësisë – s’ka paraparë asnjë aktivitet për periudhën e janar-qershor 2018.
