Interpol zbulon në Serbi, Maqedoni dhe Bosnjë një arsenal të madh armësh të prodhimit rus, të destinuar për Europën Perëndimore dhe në veçanti për Francën.
Siç bën të ditur Interpol, operacioni ka nisur në Lion të Francës, prej nga ku është drejtuar gjithçka.
Një kontrabandë masive armësh zhvillohet me qendër Ballkanin dhe sipas policisë franceze, një pjesë e municioneve dhe armatimeve merren nga Rusia, prej nga ku mbërrijnë në Serbi me avion.
Që në atentatet e Parisit, nëntorin e shkuar u zbuluan se armët e sulmit në teatrin Bataclan dhe në disa kafe të Parisit ishin kallashnikovë të prodhimit jugosllav.
Interpol bën të ditur se janë arrestuar rreth 14 persona dhe është sekuestruar sasi e madhe armatimi e municionesh.
Arsenali i kapur në serbi përbëhej nga më shumë se 40 armë zjarri, gjashtë kg eksploziv, 11 granata dore dhe 1.300 fishekë.
Siç bëjnë të ditur mediat serbe, rreth 5000 punonjës police janë angazhuar në këtë aksion që u zhvillua në Bosnjë dhe Hercegovinë, Kroaci, Maqedoni, Mali të Zi, Serbi dhe Sllovenia.
Sipas të dhënave të Interpolit, policitë e këtyre shteteve kanë ndaluar rreth 43.000 të dyshimtë gjatë kalimeve kufitare dhe të gjithë këta persona janë kontrolluar me imtësi.
“Sulmet e fundit terroriste në Europë dhe në botë, ku armët e zjarrit në vend dhe eksplozivët kanë qenë armët kryesore, tregojnë se janë të nevojshme kontrollet sa më efektive në pikat kufitare”, tha Tim Morris, drejtor ekzekutiv i Shërbimeve të Policisë së Interpolit.
Operacioni i koduar me emrin “Trigger” ka për qëllim të krijojë një bazë të dhënash më konkrete për Ballkanin në mënyrë që të arrihet një mënyrë më efikase.
Ndërkaq, një qendër e fuqishme e koordinimit të luftës ndaj krimit është ngritur në Sarajevë, ku ndodhet dhe komanda ballkanike e Interpolit.
Informacioni i mbledhur gjatë operacionit tani do të analizohet për të identifikuar lidhjet e mundshme me aktivitete të tjera kriminale apo terroriste në të gjithë rajonin dhe më gjerë.
/tesheshi.com/
