Dmitry Medvedev, ish-president i Rusisë dhe aleat i vjetër i presidentit rus Vladimir Putin dhe nënkryetar aktual i Këshillit të Sigurimit Rus, akuzoi Shtetet e Bashkuara të Amerikës për “përhapjen e kaosit dhe shkatërrimit në mbarë botën për qëllimin e “demokracisë së vërtetë”.
Medvedev komentoi vendimin e SHBA për të mbështetur krijimin e një gjykate ndërkombëtare për të ndjekur penalisht krimet e mundshme të luftës në Ukrainë.
“E gjithë historia amerikane që nga nënshtrimi i popullsisë vendase indiane është një seri luftërash të përgjakshme. A është mbajtur dikush përgjegjës për këto krime? Cila gjykatë e ka dënuar detin e gjakut që SHBA ka derdhur atje?”, tha ai.
Ai thotë se krijimi i gjykatës për krimet e luftës është një përpjekje e SHBA për të “gjykuar të tjerët duke mbetur imun ndaj çdo gjyqi”.
“SHBA dhe kukullat e saj të padobishme duhet të kujtojnë fjalët e Biblës: Mos gjykoni dhe nuk do të gjykoheni,” tha Medvedev, duke shtuar se përndryshe “zemërimi i Zotit një ditë do të vijë në shtëpinë e tyre”.
Sot, Medvedev publikoi një tekst të gjatë në kanalin e tij Telegram, ku tallet me mundësinë që dikush nga Rusia të përfundojë në një gjykatë ndërkombëtare për sulm ndaj Ukrainës.
Duke cituar fjalimin e tij në një forum juridik ndërkombëtar në Shën Petersburg, Medvedev deklaroi: “Unë i quajta të çmendura përpjekjet për të krijuar gjykata për të hetuar të ashtuquajturat operacione ruse. Këto propozime nuk janë vetëm ligjërisht të pavlefshme. Ideja për të ndëshkuar vendiN që ka arsenalin më të madh bërthamor është absurd në vetvete dhe potencialisht kërcënon ekzistencën e njerëzimit”.
Më pas, Medvedev pyet veten se “kush është ai idiot” që bën thirrje për një gjyq të Rusisë dhe i përgjigjet pyetjes së tij – Shtetet e Bashkuara. Më pas ai rendit një listë të gjatë të ndërhyrjeve ushtarake të SHBA-së që nga fundi i Luftës së Dytë Botërore.
“Vietnami dhe Koreja, Jugosllavia dhe Iraku, Afganistani dhe Siria janë të vetëdijshëm se sa katastrofike mund të jenë pasojat e pushtimeve të tilla. Lista është e gjatë dhe në rritje. Amerika ka vrarë më shumë se 20 milionë njerëz në 37 vende që nga fundi i Luftës së Dytë Botërore, sipas një studimi nga u botua nga Global Research.
Mendoni për këtë – më shumë se 20 milionë! Autori i atij artikulli, James A. Lucas, bën një pyetje: Sa sulme si ato të 11 shtatorit ka kryer Amerika në vende të tjera: Përgjigja është rreth 10.000”, shkruan Medvedev.
