Opozita nuk ka asnjë skenar për bllokimin e seancës konstituive të Kuvendit të Shqipërisë. Kështu u shpreh kreu republikan, Fatmir Mediu, pas një takimi që zhvilloi me kryetarin e PD-së, Lulzim Basha.
Në qendër të takimit Mediu-Basha ishin prioritetet e opozitës në legjislaturën e re, që do të nisë më 9 shtator.
“Diskutuam gjerësisht për angazhimet e deputetëve të opozitës në parlament dhe koordinimin e të gjithë forcave opozitare.
Diskutuam edhe për pritshmëritë dhe zhvillimet që kanë të bëjnë me reformën zgjedhore dhe kushtetuese, që kanë nevojë për një angazhim të gjithë nivelit të ekspertëve brenda opozitës para se të diskutojmë për marrëdhënien me qeverinë.
Për reformën zgjedhore duhet ti japim zgjidhje influencës së krimit dhe parasë në proces. Sa i përket asaj kushtetuese mendoj se orientimi i Shqipërisë duhet të jetë drejt një shteti të së drejtës ku individi është në plan të parë, kufizimi i autoritetit të ekzekutivit dhe ndarjen e pushteteve”, tha Mediu.
Ndërkohë në lidhje me përbërjen e qeverisë “Rama2”, kreu i PR-së tha se është një ekzekutiv i vjetër me pazare të reja.
