Nga Mensur Krasniqi
Përkundër thirrjeve të djeshme të mediatorit belg, Piter van Hojte, mbi përshpejtimin e procedurës për dalje nga kriza politike, gjegjësisht zgjedhjen e Prokurorit special, gjendja ende mbeten status-quo.
Bisedimet e djeshme mes katër liderëve të partive më të mëdha në Maqedoni zgjatën thuajse deri në mesnatë, megjithatë disa burime nga ekipet biseduese thanë se ende shumë çështje ngelen të hapura. Nuk ka marrëveshje për zgjedhjen e Prokurorit të ri Special.
Lehtësuesi belg, Hojte, para fillimit të raundit të djeshëm të bisedimeve mes katër partive politike nënshkrues të Marrëveshjes së Përzhinos deklaroi se një parti e madhe nuk i përmbahet asaj që do të thotë “marrëveshje” dhe nuk i respekton afatet përfundimtare që është e papranueshme në udhëheqjen e bisedimeve dhe arritjen e marrëveshjes përfundimtare.
Van Hojt para gazetarëve tha se ata ballafaqohen me problem të madh, që lidhet me dy gjëra.
Ai tregoi një letër ku në anglisht dhe maqedonisht shkruan “fjala është fjalë”.
“Unë po shoh se një nga partitë më të mëdha nuk po respekton afatet finale dhe nuk po respekton marrëveshjen. Kjo nuk është mënyra e të biseduarit, nuk mund të arrish marrëveshje nëse nuk e respekton atë që keni akorduar”, deklaroi Van Hojte.
Duke treguar një letër tjetër ku shkruan “llogaridhënie” në gjuhën angleze dhe maqedonase, theksoi se ky problem është më i madh.
Problemi tjetër, edhe më i rëndësishëm, është se në Evropë kemi sistem vlerash. Vendet që dëshirojnë të bëhen anëtare, duhet të respektojnë sistemin tonë të vlerave. Një prej vlerave më të rëndësishme është llogaridhënia. Llogaridhënia do të thotë që secili funksionar publik ka obligim të japë llogari dhe t’u shpjegojë qytetarëve se çfarë ka bërë. Nëse ka çfarëdo dyshimi se mund të ketë pasur abuzim pushteti ose abuzim parash, duhet të hetohet”, tha diplomati belg.
Mbi pyetjen e gazetarëve cila parti nuk i përmbahet marrëveshjes, Van Hojte u përgjigj se “kjo ju ngel juve që të mësoni”. /tesheshi.com/
