Mbrëmë nuk u sulmua vetëm Barcelona, por një akt i ngjashëm u krye në qytetin turistik të Cambrils-it, si dhe ishte përgatitur njëkohësisht një shpërthim në Alcanar.
Mediat spanjolle bëjnë të ditur se plani i organizatorëve të sulmit të Barcelonës ishte i njëjtë me atë të Parisit, një vit më parë. Përveç përplasjes së njerëzve në kryeqendrën katalane, një tjetër makinë, por jo furgon këtë radhë, Audi A3 përplasi disa persona në shëtitoren e plazhit.
E përditshmja “El Periodico”, citon kreun e Mossos d’Esquadra, Josep Lluis Trapero, pra ekipit antiterror në Spanjë, i cili thekson se pesë terroristët e Cambrils-it janë vrarë nga policia, ndërsa njeriu që po përgatiste shpërthimin në Alcanar vdiq si pasojë e eksplozionit të bombës artizanale, kur po e lidhte me bombulon e gazit.
El Periodico thekson se të vrarët e Cambrils-it kishin të veshur jelekë me eksploziv.
Sipas policisë, prova qëndron në lidhjen thuajse lineare të tre ngjarjeve në tre destinacione të ndryshme të Spanjës. Alcanar ndodhet 90 kilometra largësi me qytetin turistik të Cambrils. /tesheshi.com/
