Mediat serbe pretendojnë se Ministri i Mbrojtjes i Serbisë, Aleksandar Vulin, është ndaluar në kufirin verior të Kosovës dhe nuk është lejuar të hyjë brenda kufijve të shtetit kosovar.
Sipas medias serbe B92, së bashku me Vulin është ndaluar i gjithë delegacioni i tij.
Ditë më parë, mediat në Serbi kishin raportuar se Prishtina mori vendimin për të ndaluar të gjithë zyrtarët serbë të hyjnë në Kosovë, e megjithatë, kryeministrja serbe Ana Brnabiç deklaroi më pas se kryeministri i Kosovës Ramush Haradinaj e njoftoi atë se ky ishte një lajm i rremë.
Ministria serbe e Mbrojtjes ka deklaruar se kjo vizitë ishte “tërësisht humanitare” dhe se përfaqësuesit e Ministrisë së Mbrojtjes dhe Akademisë Ushtarake (VMA) dëshironin të diskutonin me menaxhmentin e Qendrës Shëndetësore të Mitrovicës për mënyrat e përmirësimit të bashkëpunimit që ky institucion mjekësor kishte krijuar me VMA për gjashtë vitet e kaluara.
Në këtë qendër mjekësore trajtohen si serbët ashtu edhe pak shqiptarë që banojnë në pjesën veriore të vendit. /tesheshi.com/
