Mediat serbe janë ndarë keqas në trajtimin e debatit ndërmjet Edi Ramës dhe Aleksandër Vuçiqit sot në Beograd.
Ndërkohë që ato më seriozet ose informojnë thatë ose i mëshojnë thelbit të qëndrimit të kryeministrit shqiptar për njohjen e Kosovës, Trepçën dhe arrestimin e kreut të policisë së Mitrovicës, Nehat Thaçi, ndërkohë mediat bulevardeske flasin për kollaret e kryeministrave që sipas tyre janë veshur për t’i dhënë mesazh njëra-tjetrës.
Ndërsa në gazetën më të madhe në vend, Blic, kryetari i komisionit për diasporën në parlamentin serb ka bërë thirrje për krijimin e “Zajednicës” serbe në Tiranë, pasi komuniteti serb në Shqipëri sipas tij po përjeton ditët më të këqija.
Ndërkaq, media më e mirë në vend, ajo që ka shikueshmërinë më të madhe dhe seriozitetin në trajtim, përkatësisht televizioni B92, e ka qëndrimin e Edi Ramës në thelb.
“Kryeministri shqiptar Edi Rama i ka kërkuar homologut të tij serb që të njohë pavarësinë e Kosovës dhe ka mbështetur dialogun Prishtinë-Beograd.Ndërkohë kreu i qeverisë shqiptare ka ndërhyrë edhe për çështjen e Trepçës për të cilën ka qenë i qartë se i përket Kosovës. ‘Ju nuk mund ta sillni atë në Beograd’, tha Rama”.
Edhe e përditshmja tjetër prestigjoze. Danas thekson se “”Rama ka bërë çudi se pse Serbia nuk e njeh Kosovën, kur kjo e fundit është një realitet ndërkombëtar dhe s’ka asnjë logjikë mos ta njohësh një gjë që është”.
Kurse tabloidi Kurir e lidh duelin Rama-Vuçiç me ngjyrën e kollareve për të dominuar njëri-tjetrin.
Kjo është gazeta që sajoi takat e Ramës gjatë vizitës në Beograd herën e parë për të arritur homologun serb.
Ndërkaq, tabloidi tjetër Informer debatin mes kryeministrave i ka mëshuar tek fjala e Vuçiçit që iu drejtua kreut të qeverisë shqiptare: “Edi, më vjen keq por nuk e njeh fare çështjen e Trepçës”. /tesheshi.com/
