E përditshmja më e madhe e Beogradit, Blic, shkruan në një shkrim të saj në ballinë, se vendet e ish-Jugosllavisë janë sot në kulmin e destabilitetit politik dhe sipas saj, “tenxherja ballkanike po shpërthen”.
Më pas ka renditur dhe arsyet që gjithnjë sipas saj i lidhin me këtë destabilitet.
Për Serbinë, theksojnë se shkaktarë janë “fantazmat” apo mafia që ndodhet në hije të pushtetit dhe politikës serbe. Për kroatët, Blic, thekson se fajtorë janë njerëzit e lidhur me ish-regjimin ustash në kohën e nazizmit, të cilët po rikthejnë lavdinë e periudhës në fjalë. Gazeta serbe fajëson më pas Milo Gjukanoviqin si shkaktar i trazirave në Mal të Zi.
Ndërkaq, për Maqedoninë Blic thekson se është vazhdimisht në një lojë “Paintball” ose “luftash” që nuk mbaron kurrë.
“Vendet e ish-Iugollavisë kanë hyrë në një cikël të ri destabiliteti politik dhe social dhe tensionet, si dhe incidentet po ndodhin çdo ditë.
Drama këtë herë nuk po inkurajohet nga jashtë, nga ‘armiku’ por nga situata brenda vendit në Serbi, Kroaci, Bosnjë-Hercegovinë, Maqedoni dhe Mali i Zi”, shkruan Blic; e cila shton më tej se gjithçka po kulmon me një seri protestash dhe incidentesh të ndodhura në fundjavë siç janë ato në rrugët e Banja Llukës, Beogradit dhe Shkupit.
Më tej Blic ndalet në situatën më të fundit në Bosnje, ku shkruan se “Presidenti i Republikës Serbska, Milorad Dodik, ka kërcënuar Bosnjë Hercegovinën me një luftë të re. ‘Republika Srbska është një shtet dhe është i aftë të mbrojë veten’, ka thënë ai. Dodik e bëri këtë deklaratë pas një sërë protesash që kanë shpërthyer në Banja Luka, ku të rinjtë nuk i hanë më ‘çorbat’ nacionaliste por duan punësim dhe paga normale. Ata janë përleshur me policinë dhe kanë dalë në rrugë. Presidenti i RS dhe njeriu ndaj të cilit drejtohen protestat ka qeverisur që nga koha kur u largua Radovan Karagjiq dhe është pasuesi i denjë i tij. E gjithë politika e tij është mbështetur në antagonizmin me myslimanët e Bosnjës. ‘Sot jemi mbledhur për të mbrojtur vendin nga tradhëtarët tanë që duan të bëhen palë me Sarajevën, që nuk e duan Republikn Srbska dhe nuk e duan Serbinë’, tha Dodik, që u tall nga të rinjtë e vendit, të cilët iu përgjigjën se duan punë dhe bukë”, thekson pra Blic në prognozën e saj mbi situatën në rajon, ku si më të nxehtën veçon atë në Banja Luka të Bonsjes, pikërisht aty ku 20 vite më parë u krijua një kasaphanë, më e rënda pas Luftës së Dytë Botërore.
Përgatiti: Ylli Pata – /tesheshi.com/
