Mediat serbe kanë rinisur telenovelën e konkurrencës virtuale ndërmjet dy kryeministrave.
Një vit pas shkrimeve mbi gjatësinë e takës dhe vëllimin e buzëqeshjes, është hapur një çështje tjetër që lidhet me samitin e kryeministrave të Ballkanit që po zhvillohet në Londër.
Kështu, agjencia Beta e cituar nga B 92 ka kapur një foto të kreut të qeverisë shqiptare që ndodhet pranë atij serb dhe thekson se “Edi Rama kopjon letrat e Vuçiçit ku ndodheshin projektet ku do të kërkoheshin financime”.
Në fakt, në një filmim ku është marrë fotoja paraqitet një vështrim i Ramës drejt dosjes së Vuçiçit por termi kopjim duket më shumë si “lajm rozë” sesa si një fakt thelbësor.
Takimet e Ramës në Serbi dhe Vuçiçit në Tiranë, shumë media online i shoqëruan me lajme marramendëse për çështje folklorike por jo me zhvillime mbi bisedimet apo marrëdhëniet mes dy vendeve.
Në Londër po mbahet samiti ku krerët e qeverive do të kërkojnë para tek Banka Evropiane për Rindërtim dhe Zhvillim. Këtë herë nuk pa pasur takim mes Ramës dhe Vuçiçit por vetëm bisedime në një mbledhje të përbashkët.
Vuçiç është takuar në ambientet e konferencës me ministrin e Jashtëm të Britanisë së Madhe, Philip Hammond dhe kryeministrin e Malit të Zi, Milo Gjukanoviç.
Vuçiç në faqen e tij zyrtare në tvvitter ka shkruar se “Serbia do të paraqitet si një shembull i praktikës së mirë për shkak të reformave të zbatuara ekonomike”. Përgatiti: Ylli Pata – /tesheshi.com/
