Mediat serbe e kanë marrë me të madhe një intervistë të kryetarit të ri të komunës së Preshevës, pasi ai është i vetmi zyrtar i shtetit serb që nuk flat asnjë fjalë në gjuhën “nashke”.
Gazeta e Beogradit “Alo.rs” thekson se “Arifi flet shkëlqyeshëm gjermanisht, di mirë shqip, të cilën po e perfeksionon, ndërkohë që me zyrtarët e Prefekturës dhe zyrave në Vranjë dhe në Nish flet me përkthyes”.
Gazeta Alo e ka marrë subjektin nga një intervistë që Arifi ka dhënë për “Presheva Jonë”, dhe pas kësaj ajo ka gjetur “skandalin”.
“Ne nuk kërkojmë që problemet zgjidhen me përplasje. Ne duam të rrisim cilësinë e jetës së qytetarëve të Preshevës dhe mendoj se gjërat zgjidhen me bashkëpunim dhe paqe”, tha Arifi. Shqip, kuptohet.
Ndërkaq, analisti Cvijetin Milivojeviq nuk e sheh ndonjë problem të madh që Arifi nuk di gjuhën serbe.
“Mund të them se është problem i tij që nuk e di serbishten, pasi ai nuk mund të rrijë pa e mësuar atë nëse synon të jetë pjesë e politikës në Serbi. Do ta kufizojë më shumë të komunikojë. Por ne nuk mund ta akuzojmë për ndonjë krim vetëm e vetëm se nuk flet gjuhën tonë. Unë mendoj se është gabim të mos mësosh gjuhën e fqinjit, pasi të shton horizontin me një gjuhë të dytë dhe të tretë. Është logjike që serbët që jetojnë në very, dijnë edhe hungarishten”, tha Milivojeviq.
Ndërkaq, analisti serb kërkon që Beogradi do të duhet të punojë më mirë me komunat e Luginës së Preshevës, t’i japë më shumë fonde për rritjen e cilësisë së jetës, pasi sicc tha ai, “kjo tregon një mënyrë më humaniste të popullit, i cili realisht nuk do konfliktin”. /tesheshi.com/
