Mediat serbe kanë publikuar një dokument që është shpërndarë nga konsullata e Kosovës në Nju Jork, drejtuar të gjithë anëtarëve të Organizatës së Kombeve të Bashkuara, për të ndaluar zgjedhjen e ish-ministrit të Jashtëm serb, Vuk Jeremiç si pasardhës i Ban ki Moon-it.
Siç bën të ditur televizioni serb B92, konsullata e Kosovës i ka bashkëngjitur letrës një peticion të familjeve të personave të zhdukur gjatë luftës në Kosovë.
“Ne, përfaqësuesit e familjeve të personave të zhdukur i kërkojmë anëtarëve të OKB-së që të mos zgjedhin Vuk Jeremiçin në krye të kësaj organizate
Jeremiç është i papërshtatshëm për këtë pozicion pasi ai vjen nga një vend që ka kryer genocide gjatë luftës së Kosovës dhe ka refuzuar të hedhë dritë mbi fatin e familjarëve tanë që rezultojnë të zhdukur.
Pikërisht për këtë, zgjedhja e Jeremiçit është një fyerje ndaj familjeve tona, ndaj familjeve të zhdukura dhe familjarëve të viktimave nga pushteti serb”, theksohet në letrën e familjarëve të të zhdukurve dhe të afërmëve të viktimave të dhunës serbe.
Firmosësit e peticionit i prijnë: koordinatori i Këshillit të Shoqatës së Familjeve të Personave të Zhdukur, Bajram Cerkini; Kryetarja e Shoqatës “Nënat Qajnë”, Nusrete Kumnova; kryetari i Shoqatës për Zbulimin e Fatit të të Zhdukurve, Haki Kasumi; si dhe Zv.kryetari i Shoqatës “Zëri i Prindërve”, Hysen Hyseni.
Ata theksojnë se Vuk Jeremiç, i cili në të shkuarën nga vitet 2007-2012 ishte ministër i Jashtëm i Serbisë, nuk ka kërkuar kurrë ndjesë për krimet e kryera në ish-Jugosllavi.
“Vuk Jeremiç, i cili ka lindur dhe është rritur në Serbi, ka mbajtur pozicione të rëndësishme në politikën serbe, vend që është përgjegjës për genocidin gjatë viteve 90 në ish-Jugosllavi. Krimet e kësaj natyre kanë sjellë zhdukjen e 40 mijë personave nga 800 mijë viktimave që kanë pasur konfliktet në ish-Jugosllavi”, theksohet në letër.
Firmosësit e peticionit kanë theksuar më tej se Sekretari i Përgjithshëm i OKB-së duhet të ketë vlera të larta morale dhe profesionale dhe ky person nuk mund të jetë Jeremiç.
Familjarët e të zhdukurve i kërkojnë OKB-së që të rrisë presionin ndaj politikës serbe që të japë gjithë informacionin e nevojshëm mbi personat e zhdukur në Luftën e Kosovës. Mediat serbe që kanë botuar letrën theksojnë se do të jetë mjaft e rëndësishme qasja që do të mbajnë aleatët e Kosovës si SHBA dhe vendet e BE-së pas letrës së familjarëve.
Danas thekson se një pjesë e madhe e Fuqive të Mëdha nuk e përkrah Jeremiqin, por ai mund të përfitojë nga rotacioni, pasi këtë herë e kanë radhën përfaqësitë e popujve sllavë. Jeremiç përkrahet nga Rusia, Kina, disa vende të Amerikës Latine, por edhe vende europiane që janë të ndarë.
Do të jetë shumë i rëndësishëm qëndrimi i vendeve të Lindjes së Mesme dhe Afrikës.
/tesheshi.com/
