Mediat serbe i kanë dhënë një peshë të madhe deklaratave të kryeministrit Edi Rama në Këshillin e Atlantikut në Uashington.
Agjencia e lajmeve Tanjug, citon zyrën e shtypit të kryeministrit shqiptar dhe thekson se Rama e ka cilësuar Rusinë si një rrezik të madh të Ballkanin.
Kurse televizioni B92, thekson se kryeministri shqiptar Edi Rama deklaroi se NATO duhet të zgjerohet edhe më në rajon, duke e përkrahur ftesën ndaj Malit të Zi për hyrjen në NATO.
“Ne jemi shumë të kënaqur për ftesën që iu bë nga NATO Malit të Zi. Është diçka e rëndësishme, pasi do të bëjë rajonin më të fortë dhe më të sigurt, pasi nuk duhet të harrojmë se për herë të par, gjatë viteve të fundit, në rajon ne duhet të përballemi edhe me aktorë të tretë që nuk ishin pesë vjet më parë. Aktorë si ISIS nga njëra anë dhe Rusia nga ana tjetër, janë aktorë të tretë shumë të interesuar, të cilët e shohin rajonin si shumë strategjik”, deklaroi Rama.
Në fakt, këtë deklaratë e ka përcjellë edhe e përditshmja malazeze Vijesti, e cila thekson se FBI do të ketë rol qëndror në hetimet ndaj krimit të organizuar dhe korrupsionit.
Të enjten pasdite, kryeministri Rama do të jetë në Shtëpinë e Bardhë ku do takohet me Presidentin Barack Obama dhe zv.presidentin Joe Biden.
Edhe në njoftimin që ka dërguar zyra e shtypit, thekson se gjatë fjalës së mbajtur në Këshillin e Atlantikut, Edi Rama është pyetur mbi axhendën e takimit në Shtëpinë e Bardhë.
“Është shumë i rëndësishëm fakti që ne kemi tani një marrëveshje të përbashkët e të dakordësuar të bashkëpunimit strategjik, për të cilën punojmë bashkë. Jemi shumë të interesuar për të zhvilluar një marrëdhënie me FBI-në, për të forcuar forcat tona të sigurisë në terma sigurie, në kapacitete hetimore dhe për të qenë më të përgatitur për të luftuar krimin e organizuar, korrupsionin dhe çdo veprimitari të jashtëligjshme, që ka dëmtuar shumë aspiratat e Shqipërisë gjatë këtyre dy dekadave e më shumë”, tha Rama. /tesheshi.com/
