Serbët frikësohen se çështja e Demarkacionit do të hapë “petët e lakrorit” të Sanxhakut, krahinës serbe me shumicë muslimane që ndodhet ngjitur me vijën e kontestueshme kufitare Kosovë-Mali i Zi.
Milovan Dreçun, deputet i partisë Progresiste serbe të kryeministrit Vuçiq, që është kryetar i Komisionit për Kosovën dhe Vojvodinën në Parlamentin serb, shprehet i shqetësuar për debatet mbi Demarkacionin.
Siç bën të ditur televizioni serb B92, Dreçun e ka shprehur këtë shqetësim për portalin qeveritar rus “Sputnik”.
“Territori për të cilin zihen dy shtetet i përket Republikës së Serbisë”, ka thënë Dreçun, i cili ka shtuar: “po kërcënohet siguria e komuniteteve të tjera që banojnë pranë kësaj zone që nuk janë as shqiptarë, as malazezë, por serbë. Urrejtja e protestuesve kundër demarkacionit i drejtohet pikërisht serbëve dhe ky është një rrezik që duhet të menaxhohet”.
Dreçun deklaroi se kjo është taktikë për të vonuar Zajednicën. “Është një taktikë transparente që ecën në favor të shqiptarëve fatkeqësisht, që po mundohen të ushtrojnë presion tek komuniteti ndërkombëtar, veçanërisht tek Uashingtoni, për të realizuar kërkesat e tyre, duke kërcënuar për dhunë”, deklaroi për “Sputnik”, kreu i komisionit parlamentar serb për Kosovën.
Dreçun ndërkaq ka akuzuar kryeministrin malazez Milo Gjukanoviç se po vepron kundër interesave serbe që kur ka njohur pavarësinë e Kosovës.
Dhe sipas tij, Gjukanoviq tani do të vuajë pasojat.
Por ajo që shqtëson më shumë serbët është çështja e Sanxhakut, pasi shumë shpejt do të nisë demarkacioni i Serbisë me Malin e Zi, për të cilin banorët e Sanxhakut theksojnë se kjo krahinë është ndarë padrejtësisht ndërmjet dy vendeve.
Çfarë do të ndodhë në Ballkan?!
Dy javë më parë, në kryeqendrën e Sanxhakut ishte vetë kreu i muslimanëve boshnjakë, Bekir Izetbegoviç, i cili deklaroi se partia që ai drejton, partia e Aksionit Demokratik do të mbrojë si gjithmonë të drejtat e muslimanëve në të gjithë hapësirat e ish-Jugosllavisë.
Kjo po që është “nyja gordiane” pas Kosovës në Ballkan.
Pak ditë më parë, ish-presidenti i Serbisë, Boris Tadiq, deklaroi se Ballkani është në situatën e viteve ‘90 dhe rrezikohet një tension i lartë ndëretnik.
Siç duket deklaratat e Tadiq, për gazetën “Danas”, duket po vijnë çdo ditë e po vërtetohen…
/tesheshi.com/
