Gjendja e mediave në Kosovë është në situatë shumë të vështirë, sidomos atyre online, konkretisht portaleve. Numri i madh i tyre, mënyra se si financohen, keqinformimi dhe gjuha e urrejtjes, janë disa ndër sfidat. Kështu u tha sot në një konferencë të organizuar në Prishtinë nga Misioni Organizatës për Siguri dhe Bashkëpunim në Evropë.
Xhevahire Izmaku, kryetare e Komisionit për Media të Kuvendit, tashmë të shpërndarë, dha jo pak vërejtje për mënyrën si funksionojnë portalet, ku sipas saj kodi etik në to është shumë periferik, derisa ka theksuar se ka përmbajtje të cilët lëndojnë shumë qytetarë .
“Ekzistojnë qindra portale të cilave nuk i dihen adresat dhe as pronarët ose kush i financon. Ndër sfidat me të cilat përballen mediat janë edhe gjuha e urrejtës dhe keqinformimi”, tha ajo.
Ndërsa, Imer Mushkolaj , kryesues i Bordit të Këshillit të Mediave të Shkruara të Kosovës, tha se portalet kosovare janë lehtësisht të dallueshme se cilit pronar i përkasin në bazë të asaj se çfarë plasojnë.
“Është me shumë rëndësi të diskutohet çështja e vërtetësisë dhe kuptimit të përmbajtjes së lajmeve, të cilat i konsumojmë çdo ditë”, tha ai.
Kurse, Agron Bajrami kryeredaktor i gazetës “Koha Ditore”, tha se lajmet e rrejshme janë lloj i përpjekjes që për qëllim kanë synimin politik.
Sipas tij, shumica e portaleve nuk janë mediume as në sensin teknik, meqë nuk kanë të punësuar as gazetarë, as redaktorë, e as lektorë./tesheshi.com/
