Mensur Krasniqi
Pas publikimit nga portalet maqedonase të lajmit se heroina shqiptare Shote Galica ka djegur fëmijë serbë, ka reaguar ashpër ish-sekretari shtetëror në Ministrinë e Kulturës, Muzafer Bislimi. Sipas tij, kjo është një shpifje të cilën truri i njeriut as nuk mund ta paramendojë.
Bislimi thotë nëpërmjet rrjetit social facebook se populli shqiptar nuk ka kryer asnjëherë gjatë historisë
gjenocid dhe masakër ndaj fëmijëve, por një gjë të këtillë e ka bërë vetë Serbia, duke i vrarë fëmijët serbë në Pejë për t’i fajësuar shqiptarët e Kosovës.
Ai kërkon urgjentisht nga institucionet shtetërore dhe nga prokuroria që ndaj portaleve maqedonase të ngrihet padi për shpifje dhe urrejtje ndëretnike.
Si historian, Muzafer Bislimi edhe haptazi e pranon se është i gatshëm që të nënshkruajë çfarëdo padie në gjykatë, e nga mediat maqedonase do që t’i kërkojnë falje publike popullit shqiptar.
Përndryshe, sot mediat maqedonase në Shkup e përshkruanin Shote Galicën, heroinën kombëtare shqiptare, si një përbindëshe që i ka djegur të gjallë fëmijët serbë, duke hedhur valle rreth zjarrit ndërsa ata digjeshin.
Kjo tendencë e mediave maqedonase ka si synim krijimin e imazhit të rremë se shqiptarët janë armiq të betuar të maqedonasve dhe serbëve. Me këtë tendencë është kërkuar njollosja e shqiptarëve si popull i dhunshëm, i cili i djeg edhe fëmijët e djepit.
Mediat maqedonase në Shkup, duke mos respektuar asnjë kod gazetaresk, e po ashtu asnjë ligj, me anë të lajmeve të tilla nxisin hapur gjuhën e urrejtjes, çka është e ndaluar me Kushtetutë.
Asnjë organizatë apo parti shqiptare nuk ka reaguar deri tani ndaj denigrimit të qëllimshëm të heroinës Shote Galica. /tesheshi.com/
