Mediat greke sulmojnë ashpër kryeministrin shqiptar Edi Rama pas deklaratës së tij se, “Shqipëria nuk do t’i hapë portat dykanatësh për refugjatët”, e se, “nuk mund ta shpëtojmë ne botën”.
Deklarata e Ramës në emisionin Top Story të Sokol Ballës është konsideruar si “cinike dhe jo humane” nga mediat greke.
Kanalet shtetërore televizive ERT3 dhe ERT, që kanë transmetuar pjesë nga emisioni, do të theksonin se, “Rama, duke i parë vendet fqinje ta reduktojnë gradualisht hyrjen e refugjatëve, ka deklaruar se nuk do të lejojë që Shqipëria të bëhet një korridor i ri kalimi për ta”.
“Shqipëria nuk do t’i hapë kufijtë e saj ndaj refugjatëve”, është titulli i proqeveritares Avgji, e cila thekson mes të tjerash se autoritetet shqiptare kanë marrë masa të rrepta si në kufijtë me Greqinë dhe Maqedoninë, ashtu dhe në rrugët kryesore që lidhin vendin me fqinjët, në mënyrë që të shmangin kalimin e refugjatëve nga jugu drejt veriut të Shqipërisë apo qyteteve bregdetare.
“Mbyllim kufijtë. Nuk do ta shpëtojmë ne botën”, është titulli i artikullit që publikon e përditshmja Ta Nea, e cila u referohet deklaratave të kryeministri shqiptar, që, siç thekson ajo, i përgënjeshtruan deklaratat e disa orëve më parë të ministres së Integrimit, Klajda Gjosha, nga Korça.
Disa portale greke e fshikullojnë kryeministrin shqiptar për ndryshimin e pozicionit të tij, duke i rikujtuar atij se me këtë linjë të ashpër, të mbylljes së kufijve, harron shpejt se kanë kaluar vetëm 25 vite nga 1991-shi, kur mijëra shqiptarë gjetën strehim brenda dy muajve në Greqi, e më pas një lumë shpirtrash njerëzorë, njëri mbi tjetrin, udhëtuan me çfarë mundën drejt Italisë nga portet e Durrësit dhe të Vlorës.
Epirouspost thekson se udhëheqja shqiptare duhej të tregohej më e ndjeshme. /tesheshi.com/
