Qindra emigrantë mbërrijnë në Beograd, deri te parku afër stacionit të autobusit. Aty ata marrin ushqim, veshmbathje nga persona vullnetarë, presin miqtë e tyre, dhe negocojnë me kontrabanduesit, njofton Deutsche Well.
E përditshmja Die Welt ka transmetuar një dokumentar të titulluar “Rruga e re ballkanike”. Pas marrëveshjes së re të Bashkimit Evropian me Turqinë, gazeta shkruan se emigrantët po shfrytëzojnë rrugën përmes Bullgarisë, Serbisë dhe Hungarisë, për të vazhduar për në vendet perëndimore.
“Prej kohës kur Turqia i pranon prapa emigrantët e kthyer nga Greqia, ndërkohë që Maqedonia nuk i lejon të kalojnë në territorin e saj, një numër gjithnjë më i madh i emigrantëve po kalojnë kufirin e gjelbër për në Bullgari, pastaj për Serbi. Një qytetar afganistanas thotë se zyrtarët kufitarë bullgarë disa herë e kishin rrahur duke e kthyer prapa në Turqi, derisa përfundimisht kishte arritur në Beograd” shkruan Die Welt.
Siç shkruan kjo gazetë, njeriu kyç për kontrabandimin e emigrantëve për në Beograd është siriani i njohur me nofkën “Sultan”.
Një vullnetare me emrin Branislava Đonin, duke folur për Sulltanin thotë se ai udhëheq punën e tij prej tarracës së një restorani afër parkut, dhe gjatë tërë kohës është i rrethuar me klientë. Ai nuk fsheh aktivitetin e tij, madje ndihet edhe krenar për punën që bën.
Sipas reportazhit, kontrabanduesit kërkojnë nga 800 euro deri në Beograd, ndërsa 2.000 euro deri në Vjenë ose Gjermani; ndërkaq opsionet më të lira kushtojnë 100 euro që nënkupton kalimin nëpër murin tre metra të lartë përgjatë kufirit serb-hungarez.
“Të dhënat zyrtare të Hungarisë tregojnë se që nga fillimi i vitit janë kapur 11.000 vetë për shkak të kalimit illegal; 3.600 tjerë kanë kaluar kufirin në mënyrë legale përmes zonave të tranzitit në kalimet kufitare, ku policia kryen punën e saj me ritmin sa më të ngadalshëm që është e mundur me qëllim të kufizimit të fluksit të emigrantëve”, shkruan Die Welt.
“Sipas të dhënave zyrtare, gjatë këtij viti në Hungari janë dorëzuar 12.000 kërkesa për azil. Kërkesa për azil nënkupton marrjen e biletës për njërin nga kampet e hapura në vend, prej ku shumica prej tyre shumë shpejt zhduken pa gjurmë”, shton gazeta.
Ndoshta, përfundon Die Welt, deri te kontrabanduesi do të vjen edhe afganistanasi nga fillimi i dokumentarit. Kusht është që familja e tij të mbledhë të holla e t’ia dërgojë përmes “Western Unionit” në Beograd. Dhe porsa t’i ketë paratë, do të vazhdojë më tutje. Ngase – dhe kjo është porosia në Die Welt – rruga e fshehtë ballkanike funksionon pa problem, thotë Dojče Vele. /tesheshi.com/
