Ka shkuar shumë larg armiqësia kreut të LSI-së ndaj aleatit të tij në qeveri, Edi Rama.
Pasi ia ka shënjestruar dhe akuzuar çdo ministër dhe bashkëpunëtor të tijin dhe ka folur për lidhje dhe afera të rënda, sot qarqet pranë kreut të LSI-së kanë kaluar kufirin dhe kanë akuzuar ish-kryeministrin e Britanisë së Madhe, Tony Blair, se vjen në Shqipëri për drogën e Edi Ramës.
Një akuzë që nuk del nga ndonjë sajt anonim, por nga gazeta Koha Jonë e Nikollë Lesit, e cila prej më shumë se 3 muajsh është në rreshtin e parë e sulmit pro Ilir Metës.
Autori i shkrimit është as më shumë e as më pak por Frrok Çupi, ish-kundërshtari dhe sot përkrahësi më i zjartë i Sali Berishës.
Çupi, i cili drejton një portal që redaksinë e ka pranë zyrës së “doktorit”, në shkrimin e tij thekson se
“Edhe në Shqipëri e presin si në Freetovvn të Sierra Leone.
Kryeministri e ka këshilltar, e pret me pompozitet edhe në pushimet e Himarës. Pavarësisht se në Angli kërkohet për gjyq…. A këshillon Blair pa pagesë, siç kanë deklaruar këta? E pamundur. Ose krejt e mundur. Pagesa është te droga që po bëhet gati por t’u transportuar në shtetet e Perëndimit. Tipa si Blair, të kontestuar në vendin e tyre si në Angli dhe të rrethuar nga turmat si në ‘Sierra Leone’, bëhen garantë të transportit të narkotikëve. Teknikat dhe lidhjet e tyre janë shumë të sofistikuara.
Përfitimet këtu janë shumë të mëdha. Qeveria shqiptare ka një prodhim shumë të mbarë droge këtë vit dhe po e kontrollon mrekullisht fort. Fitimet e drogës që mund të ndahen pak me secilin “Blair”, do të përdoren për të ndërtuar tirani politike mbi popullin e varfër ‘sierraleonas’ të Shqipërisë.
Kjo është njëra anë e botës, e elaboruar nga trafikantët e sofistikuar”, shkruan Çupi.
Ndërkohë, Artur Zheji, dy ditë më parë, gati nuk thoshte të njëjtat gjëra por vetëm se nuk përmendte drogën. Sipas shkrimit të Zhejit, “Ditë të këqia do t’i vijnë Shqipërisë nga Tony Blair”.
Por që të vijmë me këmbë në tokë, pse sulmohet kaq ashpër ish-kryeministri britanik nga LSI?!
Çfarë pune i prish Blair kur pa sulmuar atë mund ta kalojë me akuza ndaj Edi Ramës dhe bashkëpunëtorëve të tij?!
Fakti është se Blair, në 3 vitet e Ramës nuk ka qenë thjeshtë “guru-ja” politik i tij, por ka qenë ai që ka diktuar zhvillimet dhe aleancat e Edi Ramës në perëndim.
Ka qenë dhe është jo një lobist dosido, por një qeveritar pa portofol që arrin të jetë një lloj alteregoje ndërkombëtar apo koracë diplomatike e Edi Ramës.
Dhe Ilir Meta, këtë koracë nuk e ka prekur siç duket nga aspekti diplomatic, qoftë edhe duke paguar në agjenci lobimi, ndaj po e përdor për konsum të brendshëm.
Dhe fabula, edhe mund të gjejë ndonjë përkrahës për faktin se Edi Rama ka normalisht të pakënaqur, por edhe numri i konsiderueshëm i sipërfaqeve të mbjella me kanabis këtë vit jep një spunto për të akuzuar këdo si “baron” droge.
Por realisht akuza për Tony Blair nuk do të funksiononte, pasi ish-kryeministri britanik as që mund të mendohet se bën deal me trafikantë narkotikësh. Të paktën në perëndim askush nuk e beson…
/tesheshi.com/
