E ndërkohë që procesi i votimit në zgjedhjet vendore ka përfunduar dhe të gjithë jemi me sytë nga mediat për të mësuar të rejat më të fundit të rezultateve në vend, ndërkohë që vijon procesi i numërimit të votave, mediat e huaja kanë pasqyruar këto zgjedhje, duke i cilësuar ato si një test për Shqipërinë.
Gjermania Deutsche Welle i ka quajtur zgjedhjet e së dielës si një provë për demokracinë e brishtë të vendit.
Agjencia Italiane e Lajmeve “ANSA” veçon faktin se zgjedhjet kryen me reformën e re administrative-territoriale, në bazë të së cilës, shqiptarët do të zgjedhin 61 kryetarët e rinjtë bashkive të vendit.
“Mbi 3.37 milionë shqiptarë janë thirrur të votojnë në zgjedhjet e para pas reformës administrativo-territoriale, e cila ka reduktuar në mënyrë drastike nga 373 në 61 bashki në tëgjithë vendin. Procesi i ditës së dielë prezanton testin e radhës së Shqipërisë në rrugën e saj të integrimit evropian”,- shkruhet në ‘ANSA’.
Ato i referohen deklaratës së Presidentit të Shtetit, Bujar Nishani, i cili ka thënë: “ky duhet të jetë investimi ynë i parë për hapjen e rrugës së negociatave”.
Francezja AFP i cilëson zgjedhjet lokale si një faktor që do të ndikojë në procesin e anëtarësimit të vendit në Bashkimin Europian. Në të shkruhet se zgjedhjet lokale janë një test për koalicionin e majtë qeverisës, në pushtet prej vitit 2013.
Zvicerania “Blick” kujton se në dekadat e fundit, zgjedhjet në Shqipëri janë karakterizuar nga dhuna dhe akuzat për manipulime.
Ndërkaq, me tone të ashpra flet për këto zgjedhje Fausto Biloslavo, i cili në një shkrim të publikuar në ‘Il Giornale’ hapet me titullin “Kriminelë por kandidojnë për kryetarë bashkie: Shqipëria rrezikon të humbasë Europën”.
“World Bulletin” raporton procesin e votimit deri në përfundim të tyre dhe bën një përmbledhje të 21 qershorit, nën shkrimin me titull “Përfundon votimi në zgjedhjet lokale në Shqipëri”. /tesheshi.com/
