Që Antonio Casano ka thënë dhe bërë budallallëqe gjatë karrierës si futboll, kjo qëndron gati në raportin 1 me 1: Pra cdo vit, një gafë. Madje në Itali u bë aq fenomen, saqë ato që thoshte Antonio, u quajtën “casanate”, duke nënkuptuar budallallëqe.
Gafa e tij më e fundit, edhe pse në moshën 33-vjecare, kur nënshkroi për ekipin e Veronës, pastaj pas pak ditësh tha se do të tërhiqej nga futbolli, për të përgënjeshtruar të nesërmen veten, janë dëshmi e një lloj “fresku” që fryn pandalshmërisht në trurin e tij, që nga adoleshenca e parë, e deri në këtë aktualen. Por mediat italiane, nisur nga ky fenomen, kanë renditur edhe të tjera gafa që kanë bërë lojtarë me emër, përgjatë viteve.
Ndër më të rejat, ishte ajo e mesfushorit argjentinas Lucas Biglia, i cili menjëherë pas transferimit tek Milan, përshëndeti nga televizioni tifozët e kësaj skuadre, me frazën: “Forza Lazio!”. Natyrisht që 30-vjecari e korigjoi pas pak atë që mbase i doli nga shpirti, pas disa viteve të kaluara me Lazion, por opinioni e kuptoi sa i përqëndruar ka qenë tek skuadra e tij e re.
Edison Kavani ka qenë një tjetër lojtar i njohur, që në subkoshiencë, ka tentuar të ndryshojë rendin e gjeografisë botërore. Në prag të një ndeshjeje të lefshme për Kupën e Amerikës, sulmuesi uruguaian ka deklaruar: “Si gjithë skuadrat afrikane, kualiteti i Xhamajkës është forma fizike”. Po si s’ia tha njeri dreqin që Xhamajka “e shkretë”, nuk ndodhet në kontinentin afrikan.
Edhe Leo Mesi i famshëm nuk i ka shpëtuar renditjes së “gafaxhinjve”. Gjatë një emisioni televiziv në Egjipt, argjentinasi dhuroi live një palë këpucë të tijat, pas ankandandit të të cilave, të ardhurat do të shkonin për bamirësi. Por gjesti i tij bujar nuk u kometua si i tillë nga opinioni vendas, pasi në këtë shtet, të dhurosh këpucë, është mungesë respekti. Nga ta dinte “i varfri” Leo se ndonjëherë, nuk mjafton vetëm ideja…
Por nuk i ka shpëtuar kësaj renditjeje të sikletshme edhe Francesko Totti. I përfolur për një shkallë jo shumë të lartë inteligjence, ç’ka e ka pranuar edhe vetë, duke u bërë edhe personazh barcoletash, ish-kapiteni i Romës, gjatë një programi televiziv ku flitej për respektimin e të drejtave të homoseksualëve, për të shprehur solidaritetin e tij me këta njerëz, deklaroi: Unë e respektoj shumë homofobinë. E tha Franceskoja “i gjorë” siç i erdhi, por ia morën “së prapthi” fjalën (meqë shkon edhe me kontekstin). /tesheshi.com/
