Pas Aleksandër Vuçiçit, i cili në një editorial në mediat serbe (që u shpërnda edhe nga Edi Rama në shqip) fliste për qasjen e re ndaj Kosovës, ka qenë numri dy i qeverisë së Beogradit që ka pranuar Kosovën si shtet dhe realitet politik që s’mund të kthehet prapa.
Rasim Lajiç, kreu i socialidemokratëve serbë, një bashkëpunëtor i afërt i Vuçicit dhe një kandidat i mundshëm për të qenë edhe kryeministër serb(s’gjeti përkrahje në elitën e partisë së Vuçiç vetëm se është musliman), ka deklaruar për të përditshmen serbe Veçernie Novosti se Beogradi do të nisë normalizimin me Kosovën, pa e njohur Prishtinën zyrtarisht, duke nisur nga largimi i menjëhershëm nga strukturat paralele në Kosovë.
Lajiç deklaroi se Serbisë nuk leverdis “konflikti i ngrirë”, ndaj disa parti politike kanë përgatitur një platformë me disa pika për normalizimin e marrëdhënieve me Kosovën.
“Thelbi i kësaj platforme është normalizimi i marrëdhënieve mes Serbisë dhe Kosovës por pa njohje”.
Sputnik, disa ditë më parë fliste për ngjashmërinë me precedentin e Tajvanit. Pra Kina nuk e njeh si shtet, por Tajvani nuk ka pengesë në marrëdhëniet ndërkombëtare.
Ajo që Lajiç quan normalizim është edhe mbajtja e nonopolit të tregtisë të Serbisë në Kosovë.
Siç bën të ditur Lajiç, vetëm vitin e shkuar Beogradi ka eksportuar në tregun e Kosovës rreth 400 milionë euro mallra të ndryshme.
Sipas zv.kryeministrit Lajiç pika e dytë pas normalizimit është “zgjerimi i statusit të serbëve të Kosovës dhe instalimi i Zajednicës, apo Asocacionit të Komunave”.
Faza e tretë e negociatave përfshin bisedimin për hyrjen e Kosovës në organizatat ndërkombëtare përveç OKB-së.
Platformën e Lajiç e ka mbështetur edhe Milovan Dreçun, i cili është kreu i komisionit të Kosovës në Parlamentin serb dhe i përket krahut konservator të partisë së Vuçiçit, një pjesëtar i fraksionit që kanë referencë ish-presidentin Tomislav Nikoliç.
Dreçun thekson se “dialogu me Kosovën është i domosdoshëm dhe mund të ndiqen hapa të guximshëm, por vetëm që të përcaktohet që në fillim se nuk do të pranohet Kosova në OKB”.
Ndërkaq, Çedomir Jovanoviç, kreu i Partisë Liberale Serbe, ish-mik i kryeministrit të ndjerë Zoran Xhingjiç, deklaroi për Veçernie Novosti, se “tentativeapër bllokimin e hyrjes së Kosovës në organizata ndërkombëtare është një budallallëk dhe nuk e ndihmon aspak Beogradin apo serbët. Kjo është thjesht logjika e strucit”. /tesheshi.com/
