Përfaqësuesit e administratës në Bruksel do t’i dorëzojnë një ultimatum Serbisë të enjten, shkruajnë mediat serbe.
Sipas Novosti, delegacionit të Beogradit, i cili po udhëton për bisedime me Mirosllav Lajçak dhe përfaqësues të institucioneve të Prishtinës, do t’i dorëzohet një projekt-marrëveshje gjithëpërfshirëse në selinë e Bashkimit Evropian.
Marrëveshja, thuhet më tej, nënkupton njohjen de-fakto të Kosovës nga Serbia.
Bashkëbiseduesit nga qarqet diplomatike pretendojnë se Brukseli, përmes të dërguarit special Lajçak, planifikon të dorëzojë një draft konfidencial për kreun e ekipit serb Marko GJuriç, me një kërkesë për t’ia përcjellë atë Presidentit serb Aleksandar Vuçiç.
Ministri i Jashtëm serb Ivica Daçiç tha se Beogradi nuk ishte në dijeni se një projekt-marrëveshjeje gjithëpërfshirëse do t’i dorëzohej delegacioneve të Prishtinës dhe Beogradit të enjten në Bruksel.
Daçiç shtoi se ishte i bindur se, nëse do të kishte një propozim të tillë, “Vuçiç do të përgjigjej në përputhje me interesat shtetërore dhe kombëtare”. /tesheshi.com/
