Ahmet Çatajev mendohet të jetë planifikuesi i sulmeve terroriste në aeroportin Ataturk të Stambollit, prej të cilëve humbën jetën 44 persona e u lënduan qindra të tjerë.
Russia Today i kushton një artikull të tërë planifikuesit të sulmeve, duke ofruar një histori të gjatë të aktivitetit të Çatajevit, e të faktit se si Rusia nuk arriti ta ekstradonte atë për shkak të statusit refugjat që kishte në Austri.
Sulmi fatal u organizua nga Ahmet Çatajev, një qytetar rus me origjinë çeçene, që iu bashkua ISIS-it në 2015-tën, raporton RT-ja duke iu referuar shtypit turk.
Çatajev del të jetë një person i kërkuar prej kohësh nga autoritetet ruse, por që me azilin e siguruar në Europë ka mundur ta shmangë ekstradimin.
Ai ka qenë pjesë e Luftës së Dytë Çeçene, ku ka humbur dhe një krah, për çka nisi të quhej ndryshe dhe thjesht, “Një krah”.
Planifikuesi i sulmeve terroriste ka qenë në listën e të kërkuarve në Rusi që në vitin 2003, për sponsorizim të terrorizmit, për rekrutim ekstremistësh dhe për pjesëmarrje në një grup terrorist.
Në vitin 2008 është kapur me disa çeçenë të tjerë në Suedi, pasi në makinë iu gjetën armatime. Një vit do ta çonte ai në burgjet suedeze.
Dy vite më vonë pason arrestimi në Ukrainë. Rusia ka kërkuar ekstradimin e tij, por Gjykata Europiane për të Drejtat e Njeriut urdhëroi që ai të mos dorëzohej.
Në 2011-tën do të ndalohej ndërsa kapërcente kufirin midis Turqisë dhe Bullgarisë, e megjithatë, sipas RT-së, do ta shmangte ekstradimin për shkak të ndërhyrjes së organizatave të të të drejtave të njeriut, me pretendimin se Çatajevi kishte statusin e refugjatit në Austri, e prandaj nuk mund të dërgohej në Rusi.
Në periudhën pasuese, nga 2012-ta në 2015-tën, mësohet që ai të ketë jetuar në Gjeorgji, ku përsëri ka kaluar një kohë në burg për akuza të lidhura me terrorizmin. Në shkurt të vitit të shkuar ai do të shkonte në Siri, ku iu bashkua ISIS-it. Muaj më vonë, në tetor, Departamenti i Drejtësisë në SHBA do ta bënte Ahmet Çatajevin pjesë të listës terroriste.
Sipas së përditshmes turke Sabah, ai është ende i lirë dhe po kërkohet me ngulm. Çatajev pretendohet të jetë dhe organizatori i sulmeve terroriste në Sulltanahmet e në Taksim në muajt e shkuar. /tesheshi.com/
