Aleanca e Atlantikut të Veriut (NATO) i frikësohet dhunës në Ballkan dhe për këtë arsye po dërgon përforcime ushtarake atje. Ngërçi i Ukrainës në luftën me Rusinë është gjithashtu një shqetësim i madh, dhe lufta e Izraelit me Hamasin, ka kërcënuar seriozisht interesat e sigurisë së Perëndimit, shkruan Beta.
Kjo doli edhe nga diskutimi në seancën e sapopërfunduar të krerëve të diplomacisë së Aleancës, ndonëse deklaratat nga ajo seancë ishin të shkurtra dhe fokusoheshin vetëm në luftën ukrainas-ruse, rivalitetin në rritje me Kinën dhe luftën në Gaza.
Biseda me drejtuesit
Sekretari i Përgjithshëm Jens Stoltenberg as që ka përmendur se çfarë kanë thënë për Ballkanin Perëndimor në përmbledhjen e diskutimit ministror në konferencën për shtyp, edhe pse ishte paralajmëruar.
Para seancës, Stoltenberg tha se “do të ketë diskutime për Ballkanin Perëndimor, për retorikën përçarëse dhe shkëputëse në Bosnje, po ashtu jemi dëshmitarë të dhunës serioze në veri të Kosovës, ndërkohë që ka edhe veprime malinje që synojnë trazira”.
I pyetur nga agjencia Beta se si ishte diskutimi i ministrave dhe nëse është arritur ndonjë përfundim për çështjen kyçe të marrëdhënieve ndërmjet Serbisë dhe Kosovës dhe zhvillimit në Ballkanin Perëndimor, me liderët e të cilit Stoltenberg foli disa ditë më parë, zyrtarët në selinë e NATO-s vetëm nënvizuan se në seancën ministrore “u theksua sërish përkushtimi ndaj sigurisë dhe stabilitetit të përhershëm të Ballkanit Perëndimor”.
Përforcimi i KFOR-it dhe masat e reja
Analistët në Bruksel të informuar për zhvillimet brenda NATO-s janë të mendimit se në mesin e aleatëve atlantikë, normalizimi i marrëdhënieve Serbi-Kosovë, i cili ende është i vështirë për t’u zgjidhur, është i mbushur me sfida të reja të sigurisë, dhe për këtë arsye Aleanca Atlantike, pas fuqizimit të KFOR-it me 1000 ushtarë po shqyrton edhe masat e reja për forcimin e sigurisë.
Në konferencën e fundit për media, Sekretari i Përgjithshëm i NATO-s, i pyetur nga një gazetar i mediave kosovare nëse beson se krijimi i një komuniteti të komunave në Kosovë me shumicë serbe do të nënkuptonte se nuk do të kishte dhunë dhe se kjo do të kontribuon në sigurinë e rajonit, u përgjigj se ishte “i bindur se do të ishte një hap përpara… dhe duhet t’i kushtohet kësaj”.
Ai shpjegoi se “propozimi për formimin e asociacionit të komunave me shumicë serbe mund të hapë rrugën drejt zgjidhjes dhe përparimit në dialog me ndërmjetësimin e Bashkimit Evropian”.
Stoltenberg tha gjithashtu se sulmet ndaj ushtarëve të KFOR-it dhe incidenti në Banjska në fund të shtatorit “dëshmojnë për sfidat me të cilat po përballemi në Kosovë dhe rëndësinë që të gjitha palët të ulin tensionet”.
Pamje franceze
Një nga mediat e rralla që shikoi seancën ministrore të NATO-s, gazeta franceze Les Echos shkruante se “disa ministra patën përfundime të zymta nga diskutimi”.
“Ministrat shpresonin të ishin në gjendje të uronin Ukrainën për suksesin e kundërsulmimit, por ka pasur një stopim në front pa një përparim të rëndësishëm dhe me dimrin që po vjen”, shton e përditshmja franceze e biznesit.
Gazeta shton se, “nëse kësaj i shtohet edhe lufta mes Hamasit dhe Izraelit dhe shtimi i dhunës në Ballkan, mund të konkludohet se situata është e zymtë”. /tesheshi.com/
