Media izraelite, Channel 10 ka raportuar mbi faktin se Princi i Kurorës saudite, Mohammed bin Salman i ka kërkuar këmbëngulësisht faktorit palestinez që të pranojë kushtet e paqes të ofruara nga administrata e presidentit Trump. Edhe pse nuk artikulohet konkretisht, lihet të kuptohet se te “pranimi” përfshihet dhe ajo e Jerusalemit si kryeqytet i Izraelit. Gjithsesi, Riadi është shprehur kundër vendimit të Trump muaj më parë mbi këtë çështje, e cila trazoi të gjithë faktorin ndërkombëtar, përfshirë botën islame dhe atë arabe.
Siç informohet, gjatë një takimi të mbyllur muajin e kaluar në Nju Jork me udhëheqësit e organizatave palestineze, Bin Salman ka kritikuar presidentin Mahmud Abbas.
“Në dekadat e fundit, udhëheqja palestineze ka humbur shansin duke hedhur poshtë të gjitha propozimet për paqe që janë ofruar”, citohet të ketë thënë Princi saudit.
“Është koha që palestinezët të pranojnë ofertat dhe të ulen në tryezën e negociatave, përndryshe të mos ankohen”, ka shtuar ai.
Bin Salman thuhet se e shtyu Abbasin të pranonte propozimin e paqes në SHBA pas lëvizjes së Trump. Ndërsa udhëheqja palestineze ka bojkotuar Shtëpinë e Bardhë që nga ajo kohë. Abbas tha se SHBA nuk ishte më një “ndërmjetës i sinqertë” në bisedimet e paqes.
Në këto zhvillime, një rol i dedikohet dhe dhëndrit të Trump, Jared Kushner, që thuhet se ka marrëdhënie tejet të ngushta me Princin Salman. Kushner është caktuar të mbikëqyr negociatat midis palestinezëve dhe izraelitëve dhe në krah ka udhëheqësin saudit. Ndërkohë, javë më parë Arabia Saudite lëvroi 200 milion dollarë ndihmë ndaj Palestinës. /tesheshi.com/
