Dy motoçiklistë të armatosur qëlluan për vdekje një gazetar grek, i cili po hetonte një krim, tha policia, duke shtuar se gazetari u vra afër shtëpisë së tij në Athinë, sipas Reuters.
George Karaivaz, një gazetar veteran i televizionit privat STAR TV, ishte i njohur për publikun grek për raportimin mbi rendin dhe ligjin si dhe historitë e policisë.
Aristotelia Peloni, një zëdhënëse e qeverisë, tha se vrasja “tronditi të gjithë”. “Autoritetet kanë filluar tashmë një hetim për të arrestuar dhe dënuar autorët,” tha ajo.
Policia tha që Karaivaz u qëllua nga dy motoçiklistë me plumba të shumtë pranë shtëpisë së tij në Alimos në Athinën jugore. Dymbëdhjetë gëzhoja plumbash u gjetën në vendin e ngjarjes, tha një oficer policie.
Megjithëse motivet e të shtënave janë ende të panjohura, policia konfirmoi se vrasja ishte planifikuar me kujdes.
“Kjo është një vrasje profesionale”, tha një zyrtar i policisë i cili zgjodhi të mbetet anonim sepse nuk ishte i autorizuar të bënte deklarata për media. /tesheshi.com/
