Mediat në gjuhën gjermane janë më shumë të shqetësuara me skandalet, incidentet dhe konfliktet kur luajnë Serbia, Shqipëria dhe Kroacia, sesa me paraqitjet futbollistike të këtyre kombëtareve në kampionatin europian.
Kampionati europian i futbollit përfaqëson një platformë për ekstremistët e djathtë dhe provokatorët, shkruan Süddeutsche Zeitung, duke iu referuar veçanërisht shembujve të vendeve të Ballkanit që marrin pjesë në kampionat.
Gazeta kujton se sekretari i përgjithshëm i Federatës së Futbollit të Serbisë, Jovan Shurbatoviç, madje ka kërcënuar se do të tërhiqej nga turneu nëse nuk do t’u përgjigjen thirrjeve antiserbe nga tribuna gjatë ndeshjes Shqipëri-Kroaci.
Shurbatoviç më vonë e tërhoqi kërcënimin, por lajmi tashmë ishte përhapur.
“Ajo që duhet marrë seriozisht”, shkruan Süddeutsche, “është arsyeja e zemërimit të tij: Gjatë ndeshjes ndërmjet Kroacisë dhe Shqipërisë në Hamburg, tifozët e të dyja skuadrave brohoritën “vrit, vrit, vrite serbin”. UEFA po heton dhe gjobat ndoshta do të pasojnë gjobat – që nuk do të jetë hera e parë”.
Ajo që nuk duhet marrë shumë seriozisht janë pretendimet shtesë të Shurbatoviçit, i cili tha se tifozët nga Serbia në stadiume në thelb janë “zotërinj” dhe se të tillë duhet të jenë edhe tifozët e kombëtareve të tjera”, shkruan gazeta e Mynihut.
“Një përmbledhje e vogël: Në Mynih ‘zotërinj’ serbë ndezën pishtarë, në Gelsenkirchen dhe Mynih shfaqën flamuj në të cilët Kosova konsiderohet pjesë e Serbisë. Nuk duhet të harrojmë thirrjet ‘Putin, Putin’ si dhe thirrjet për nder të kriminelit të luftës Ratko Mladiç. Madje sipas mediave angleze, tifozët serbë janë tallur me lojtarët anglezë me thirrje majmunësh”.
Sipas Süddeutsche, e gjithë kjo tregon se çfarë “emocionesh të papërmbajtshme” shfaqen kur më shumë kombe ballkanike kualifikohen në kampionat se kurrë më parë.
“Kroatët dhe shqiptarët bashkëfestuan, por Mirlind Daku iu hakërrye maqedonasve me megafon(…) Këto incidente nuk mund të shpjegohen vetëm me traumat e përjetuara”, shkruan gazeta.
Kampionati Evropian, shton artikulli, është një platformë për radikalët dhe racistët që prej kohësh janë të lidhur në ligat kombëtare të vendeve të tyre dhe udhëtojnë nga ndeshja në ndeshje. Si shembull përmenden “Ujqërit gri” turq, të cilët janë aktivë edhe në futboll.
“Do të ishte mirë që autoritetet gjermane t’i kushtonin pak më shumë vëmendje se cilët flamuj shfaqen dhe çfarë brohoritet. Shkaktimi i urrejtjes dhe fanatizmit është i dënueshëm,” përfundon Süddeutsche Zeitung.
Për një program tjetër të shërbimit publik ZDF, për të njëjtin problem ka folur Vedran Xhihiç nga Instituti Austriak për Politikë Ndërkombëtare.
“Në gjithë rajonin e ish-Jugosllavisë ka një bashkëjetesë fqinjësore shumë të helmuar”, tha ai. Pasojat e luftërave të përgjakshme të viteve 1990 “përdoren nga shumë elita politike në të gjithë rajonin për të nxitur urrejtje ndaj të tjerëve”.
Sipas mendimit të tij, një pjesë e arsyes qëndron në faktin se në pesëmbëdhjetë vitet e fundit procesi i integrimit evropian ka rënë dhe për këtë nacionalizmi është kthyer në rrymë.
“Stadiumet e futbollit ishin shpesh një vatër e nacionalizmit në vitet 1990, dhe ato mbeten të tilla edhe sot e kësaj dite”, përfundon Xhihiç. /tesheshi.com/
