“Konflikti që digjet” ndërmjet Serbisë dhe Kosovës është një temë e rëndësishme në Konferencën e Sigurisë në Mynih, “të paktën në diskutimet joformale”, shkruan Berliner Zeitung.
Thuhet se ka një “përshkallëzim” të këtij “konflikti që është kërcënim për Evropën” pasi Prishtina e hoqi dinarin, i cili prek dhjetëra mijëra njerëz që marrin paga, pensione, ndihmë sociale dhe subvencione nga Beogradi.
“Prishtina i prezantoi rregullat në mënyrë të njëanshme dhe pa paralajmërim. Ndalimi i dinarit si mjet pagese dhe futja e euros në të gjithë territorin e Kosovës nuk ka qenë kurrë temë e dialogut midis Beogradit dhe Prishtinës,” tha Snežana Jankoviç, ambasadorja e Serbisë në Gjermani.
Gazeta vlerëson se “anulimi befasues i dinarit” vë përballë vështirësive të moshuarit dhe popullsinë më të varfër.
Siç shtohet në tekst, deri më tani kompania e licencuar britanike e transportit të parave Henderson po merrte në kufi kartëmonedhat e dinarit të dërguara nga Banka Qendrore e Serbisë. Por tani transportuesit britanikë po ndalojnë në kufi.
“Veprimi i njëanshëm është një sulm i rëndësishëm ndaj popullatës serbe, mbi të gjitha ndaj më të varfërve”, pretendon Jankoviç. “Qëllimi është dëbimi i popullatës serbe nga Kosova dhe Metohia. Komuniteti ndërkombëtar duhet të parandalojë me vendosmëri dëbimin e serbëve”.
Ajo tha se Serbia nuk është e kënaqur me reagimin e BE-së dhe SHBA-së, ndonëse këto të fundit kritikuan urgjencën me të cilën u hoq dinari, por nuk e vënë në dyshim vendimin në thelb.
“Partnerët tanë perëndimorë duhet të inkurajojnë Prishtinën që ta tërheqë plotësisht këtë masë sepse mund të provokojë një krizë serioze dhe të inkurajojë Prishtinën të ndërmarrë hapa të rinj të rrezikshëm të njëanshëm”, tha kjo ambasadore serbe.
E përjavshmja Zeit në portalin e saj, me rastin e 16-vjetorit të shpalljes së Pavarësisë së Kosovës, shkruan se “kërcënimi nga Serbia është më i fortë” dhe se në Kosovën e vogël po zhvillohet gjeopolitika e madhe.
“Forcimi i së djathtës në Evropë, kthimi i mundshëm i Donald Trump në Shtëpinë e Bardhë dhe sukseset e Rusisë në Ukrainë – e gjithë kjo do të ketë pasoja negative për sigurinë e vendit”, thuhet në tekst.
Thuhet se “presidenti autoritar” serb Aleksandar Vuçiç ndjek parimin e “botës serbe” dhe se përhap “mitin” për gjoja spastrimin etnik të serbëve nga Kosova.
Gazeta rikujton se gjatë diskutimit të fundit për Kosovën, përfaqësuesi rus në Këshillin e Sigurimit e krahasoi situatën e serbëve të Kosovës me atë të palestinezëve në Gaza.
“Në Gaza, njerëzit po bombardohen. Ata nuk kanë qasje në ushqim,” tha zëvendëskryeministri i Kosovës Besnik Bislimi për Zeit Online. “Në Kosovë, nga ana tjetër, bëhet fjalë për reformën valutore që duhet të rrisë transparencën e flukseve financiare. Serbët e Kosovës ende mund të marrin pagesa në dinarë në llogarinë e tyre dhe t’i konvertojnë ato në euro.”
Gazeta thekson se në komunitetet serbe në Kosovë “vërehet shpejt” se “nuk bëhet fjalë për persekutim brutal siç paralajmëron Vuçiç”, por për pyetjen themelore nëse Serbia duhet të mbajë “struktura paralele” në Kosovë. “Shumë serbë të Kosovës mendojnë se duhet”, thuhet në tekst.
“Nëse shkollat tona bëhen pjesë e sistemit të Kosovës ose nëse nuk mund të marrim më përfitime sociale nga Serbia, atëherë do të largohemi”, thotë një serb nga Graçanica.
“Narrativa për pogromin kundër serbëve po luan me zjarrin”, shkruan më tej gazeta, duke gjetur prova për këtë pretendim në atë që ndodhi shtatorin e kaluar në Banjska.
Kujtohet se sulmi u drejtua nga Milan Radoiçiç, dhe se armët vinin nga magazinat serbe, dhe se Komisioni Evropian zyrtarisht foli për një “sulm terrorist”, por më pas “u qetësua në ministritë e punëve të jashtme të Evropës Perëndimore. “.
Bislimi thotë për këtë: “Duke shqyrtuar hartat dhe dokumentet e gjetura me sulmuesit, arritëm të besojmë se qëllimi i tyre ishte aneksimi i veriut të Kosovës”.
Siç shkruan korrespondenti i Zeita-s, në BE dhe SHBA “do të duhej të binte këmbanat e alarmit” sepse “çdo krizë në Kosovë zbulon dobësinë e Perëndimit”.
Shtrohet pyetja nëse KFOR-i, pra NATO, do të mbetet faktor i rëndësishëm në Kosovë, sepse në Evropë – tashmë në zgjedhjet për parlamentin e BE-së – pritet forcimi i së djathtës.
Domethënë, siç shkruan Zeit, të partive që mbështeten te Rusia, dhe Ballkanin e shikojnë “me syze kulturore-fetare”. “Në njërën anë është Kosova myslimane, të cilën Perëndimi e krijoi ‘artificialisht’. Nga ana tjetër, Serbia tradicionale ortodokse, e cila në logjikën e shumë partive të tilla përfaqëson Perëndimin e krishterë”.
Kjo të kujton deklaratat e përfaqësuesve të Alternativës për Gjermaninë të cilët kërkojnë tërheqjen e ushtarëve gjermanë nga KFOR-i dhe thonë se “projekti i Kosovës” ka dështuar. Ndërsa Partia e Lirisë së Austrisë thotë se Kosova është pjesë e Serbisë.
Por “kërcënimi më i madh” për Kosovën do të ishte kthimi i Donald Trump. Siç kujton artikulli, ish i dërguari i Trumpit, Richard Grenell e quajti Albin Kurtin “fashist” dhe rekomandoi tërheqjen e trupave amerikane.
“Grenell po përmendet si Sekretar i mundshëm i Shtetit, nëse Trump fiton zgjedhjet”, përfundon Zeit. /tesheshi.com/
