Në kohën kur ka dalë tërësisht jashtë sistemit, me djegie mandatesh e bojkot zgjedhjesh, e kur nuk dihet ende se si do rifutet, kreu i PD-së, Lulzim Basha, premton rritje pagash ne kushte pushteti.
“Jetojmë në një vend pa mundësi punësimi, rroga minimale është përtej çdo kufiri. Brenda 6 muajve të parë të qeverisjes rrisim pagën minimale në 300 euro. Deri në fund të mandatit, paga minimale rritet në 400 euro. Do t’i japim fund koncesioneve korruptive dhe çdo qindarkë që shkon për oligarkët dhe pushtetarët, do ta çojmë për rritjen e pagave, pensioneve dhe për të investuar për të ardhmen e fëmijëve tanë”, deklaroi Basha.
Komentet kreu i opozitës i bëri në Kongresin e 7-të të Bashkimit të Sindikatave të Pavarura të Shqipërisë.
Kujtojmë se paga mesatare në Shqipëri, referuar INSTAT-it, ka shënuar rritje me 4.5 % krahasuar me një vit më parë. /tesheshi.com/
