Presidenti izraelit Isaac Herzog u tha ligjvënësve amerikanë të mërkurën se ai mirëpret kritikat, veçanërisht nga miqtë amerikanë, por shtoi se ata nuk duhet të kalojnë kufirin e mohimit të së drejtës së Izraelit për të ekzistuar.
Ky, tha ai, është antisemitizëm, raporton Reuters.
Herzog, pozicioni i të cilit është kryesisht ceremonial, foli me një dhomë të mbushur plot me anëtarë të Senatit dhe Dhomës së Përfaqësuesve, pavarësisht mungesës së disa demokratëve përparimtarë, të cilët njoftuan se do të bojkotojnë fjalimin për çështje që përfshijnë trajtimin e palestinezëve nga qeveria e kryeministrit Benjamin Netanyahu.
Herzog foli një ditë pas një takimi në Shtëpinë e Bardhë me presidentin amerikan Joe Biden, në të cilin të dy udhëheqësit theksuan lidhjet e ngushta të vendeve të tyre pavarësisht tensioneve me qeverinë e krahut të djathtë të Netanyahut.
Mbështetje e fortë nga aleatët
“Jam në dijeni të kritikave mes miqve, përfshirë ato të shprehura nga anëtarë të respektuar të kësaj Dhomë. Unë i respektoj kritikat, veçanërisht nga miqtë, edhe pse jo gjithmonë duhet t’i pranosh ato”, tha Herzog në takimin e përbashkët në një fjalim që u prit me disa ovacione.
Por kritika ndaj Izraelit nuk duhet të kalojë kufirin e mohimit të së drejtës së shtetit të Izraelit për të ekzistuar. Vënia në pikëpyetje e së drejtës së popullit hebre për vetëvendosje nuk është diplomaci legjitime, është antisemitizëm, tha ai.
Dhoma e Përfaqësuesve miratoi një rezolutë 412 pro e nëntë kundër të martën duke shprehur mbështetjen për Izraelin dhe duke thënë se ai nuk është një shtet racist. Nëntë kundër ishin demokratë. /tesheshi.com/
