Në mënyrë që pushimet tona të jenë sa më të bukura, ato duhet të planifikohen në përputhje me tipin e secilit nga ne. Kështu, gjithsecili pëlqen gjëra të ndryshme dhe argëtohet e pushon sipas mënyrës së vet. Por cilat do të ishin destinacionet më ideale që mund t’u përshtaten tipave të ndryshëm? Ja disa prej tyre:
Për hiperaktivët – Në malet më të njohura të botës, njerëzit që e dashurojnë lëvizjen dhe gjallërinë kanë mundësi të ushtrojnë shumë sporte të ndryshme, deri edhe ato të llojit atletik. Ndër këto sporte përmendim: alpinizmin, çiklizmin, etj.
Për të lodhurit – Sardenja, Itali – Ngjyrat e zjarrta të natyrës në këtë vend janë një kurë e vërtetë për ngritjen e humorit. Era e veriut që fryn vazhdimisht në këtë ishull, lëshon në ajër një energji rigjeneruese për njerëzit që kanë nevojë të ndryshojnë gjendjen e tyre psikologjike dhe trupore.
Për sportivët – Ishulli Mauritius –Në këtë ishull parajse mund të ushtrohen shumë sporte ujore, por mund të bëhen edhe ecje të gjata në natyrë. Të apasionuarit pas golfit, do të mund të gjejnë këtu disa nga fushat më të bukura të botës për këtë sport.
Për romantikët – Santorini, Greqi – Ky ishull njihet si vendi më romantik i Mesdheut, kryesisht falë bukurisë së perëndimeve të tij. Po ashtu, në këtë ishull gjenden edhe fshatra të mrekullueshëm piktoreskë dhe një bregdet i mahnitshëm.
Për soditësit – Kijoto, Japoni – Për ata që kanë dëshirë të sodisin natyrën, një shëtitje në pyllin e njohur të bambusë, do të ishte një çlodhje e vërtetë. Ky është një vend magjik që të ofron prehje shpirtërore.
Për të martuarit – Austri. Austria është një nga vendet më të përshtatshme për familjet me fëmijë. Hotelet e posaçme me aktivitete dhe lojëra tërheqëse për të vegjëlit, janë një destinacion i vyer që ofrojnë argëtim për fëmijët si dhe pushim për prindërit e tyre.
Për eksploruesit – Australia mbetet destinacioni më tërheqës për tipat që janë në kërkim të zbulimit të gjërave të reja. Bëhet fjalë për një kontinent të tërë që ofron aventura të jashtëzakonshme, një natyrë të virgjër dhe hapësira të mëdha.
