“Kriza politike në Maqedoni ka aritur nivelin e alarmit, ndërkohë raportohet se Brukseli zyrtar ka drejtuar gishtin e përgjegjësisë nga kryeministri Gruevski, të cilin, as që dëshirojnë ta pranojnë në takime zyrtare.” – kjo shkruhet ndër të tjera nga gazeta gjermane ‘Tageszeitung’, e cila i referohet raportit të Organizatës për Siguri dhe Bashkëpunim në Evropë (OSCE), pra OSBE-së.
Kjo organizatë nga ana e saj, ditë më parë shprehu shqetësimin e thellë për rritjen e dhunës në vend, gjë që ka detyruar komunitetin ndërkombëtarë të pranojë se Maqedonia po shkon me hapa prapa, edhe pse dhjetë vite më parë besonin thellë në reformat politike dhe ekonomike të shtetit.
Sakaq, “Anijen në fundosje” – epitet ky që ka marë qeveria e Maqedonisë, edhe zyrtarisht e ka braktisur partneri i koalicionit, Partia për Ripërtirje Demokratike, një zhvillim i orëve të fundit ky. Në mbledhjen e Këshillit Qëndror të kësaj partie, mbajtur mbrëmë, është konfirmuar vendimi për dalje nga qeveria. Drtejtues të saj kanë pohuar se me këtë vendim, besohet të ketë veprime konstruktive politike, të cilat do të rezultojnë në fund me zgjedhje të jashtëzakonshme.
Dalja e saj nga qeveria, ka bërë që koalicioni i VMRO-së të mbetet me 61 deputetë dhe të humbë shumicën parlamentare, pasi shtëpia ligjvënëse numron 123 deputetë. Në këtë pikë ku kanë mbërritur zhvillimet politike, tashmë gjithçka është në dorë të BDI-së, partisë shqiptare të koalicionit, e cila ka në duart e saj fatin e qeverisë.
Ndaj dhe pritet një takim “historik” mes kreut të BDI-së Ali Ahmeti dhe shefit të qeverisë, Gruevski, për të diskutuar hapat e mëtutjeshëm se ç`fat do ketë qeveria në situatën e krijuar. Nga burime të brendshme thuhet se partia shqiptare në fjalë po përballet me presion të brendshëm për të braktisur qeverinë.
Sidoqoftë, zëdhënësi Bujar Osmani, deklaroi se dalja e BDI-së nga qeveria do të destabilizojë edhe më shumë shtetin: ”Njerëzit reagojnë emocionalisht ndërsa partia serioze mendon racionalisht. Ne, interesin tonë nuk e shohin në mënyrë afatshkurtër, por tentojmë të gjejmë rugëdalje institucionale”, deklaroi Osmani.
Nga partia ‘Besa’, thonë se zyrtarë të BDI-së janë të zhytur thellë në afera koruptive, dhe si rrjedhojë ata janë të kapur peng nga VMRO-ja: “U zbulua rasti ‘Sopoti’, po përflitet për ‘Monstrën’, është buxheti i disfavorshëm për shiptarët, dhe në fund, hyrja në qeveri pa asnjë kushtëzim, ndërsa BDI akoma mbetet në qeveri. Të gjitha këto janë indikatorë të qartë se zyrtarët e saj janë të kapur peng”, deklaroi Afrim Gashi, nga lëvizja ‘Besa’. /tesheshi.com/
