Dëshira për emigrim në Perëndim ka bërë që dhe te komunitetet e margjinalizuara të shfaqet ambicia për të mësuar shkrim e këndim. Kjo del nga një reportazh që Koha Ditore u ka kushtuar këtyre komuniteteve në Kosovë, nën titullin “Tri sfidat e mëdha të romëve, ashkalinjve dhe egjiptianëve në Kosovë”
“Benjamini mezi i lidh shkronjat në rrokje. Mësimi i shkrimit dhe i leximit është sfida më e vështirë me të cilën po përballet sivjet. Thotë se askush nuk ishte marrë me të gjatë atyre dy vjetëve sa shkoi në shkollë. Edhe ashtu nuk ishte i rregullt, para se përfundimisht ta braktiste shkollimin.
‘E kur i bana pesëmbëdhjetë vjet, ia nisa me shku me babën m’i nimu me pre dru me sharrë e m’i ça’, thekson Benjamini nga Fushë-Kosova. 22-vjeçari nga komuniteti rom është baba i dy fëmijëve. Eshtë martuar pa i mbushur shtatëmbëdhjetë vjet. Tani ëndërron botën perëndimore. Kjo është arsyeja kryesore pse mësoi në moshë madhore shkrimin e leximin”, shkruhet në reportazhin e Koha Ditore.
Sipas qëmtimit gazetaresk të bërë te këto komunitete, “braktisja e shkollimit, martesat e hershme dhe shkalla e lartë e papunësisë”, janë shqetësimet më të mëdha.
Në reportazh thuhet gjithashtu se anëtarët e intervistuar të këtyre pakicave nuk presin ndryshime të mëdha as pas zgjedhjeve të parakohshme të 6 tetorit.
“Madje i akuzojnë përfaqësuesit e tyre për krijimin e shumë partive politike me shtrirje lokale, sa për të realizuar interesat personale e familjare”, thuhet në shkrimin e Koha Ditore. /tesheshi.com/
