Numri i të vdekurve nga COVID-19 të shtunën kaloi 400,000 në Evropë, por Franca dhe disa pjesë të tjera të Evropës po rihapin dyqanet “e panevojshme” pak para fillimit të festave të Krishtlindjeve dhe Vitit të Ri, pas progresit në frenimin e përhapjes së virusit.
Numri më i lartë i vdekjeve në Evropë është në Britaninë e Madhe (57,648), Itali (53,677) dhe Francë (51,999).
Shumica e vendeve evropiane shpresojnë që masat shtrënguese do të lehtësohen gjatë festave të Krishtlindjeve dhe Vitit të Ri, duke u dhënë kështu familjeve një pushim para se të përgatiten për atë që bota shpreson të jetë vala e fundit e masave kufizuese derisa të futen vaksinat e reja më premtuese.
Dyqanet që shesin produkte jo-thelbësore hapën dyert e tyre në Francë të shtunën, megjithëse baret dhe restorantet qëndrojnë të mbyllura deri në fillim të vitit të ardhshëm.
Zyrtarët shëndetësorë thanë të premten se numri i infektimeve ra në 12,459 në ditë, krahasuar me 22,882 shtatë ditë më parë.
Numri kumulativ i rasteve të regjistruara të infeksionit me koronavirus që nga fillimi i pandemisë në Francë është mbi 2.19 milion.
Numri i njerëzve të shtruar në spital për COVID-19 gjithashtu ka rënë, duke vazhduar trendin e përgjithshëm në rënie në dy javët e fundit.
Presidenti Emmanuel Macron tha në fillim të javës se mbyllja, e cila u fut në të gjithë vendin më 30 tetor, mund të hiqej në 15 dhjetor, por vetëm nëse numri i njerëzve të infektuar bie në 5,000 deri atëherë.
Qendrat tregtare në Poloni u hapën gjithashtu të shtunën, ndërsa autoritetet belge planifikojnë të hapin dyqane të ngjashme nga 1 dhjetori, por në të njëjtën kohë synojnë të mbajnë mbylljen e pjesshme aktuale deri në mes të janarit.
Lëvizje të ngjashme për të lehtësuar masat shtrënguese po konsiderohen nga qeveritë e Gjermanisë, Luksemburgut dhe Hollandës.
Që nga e diela, qeveria italiane ka hequr pjesërisht kufizimet në provincat veriore të Lombardisë, Piemonte dhe në Kalabri në jug të vendit, duke ndryshuar nivelin e paralajmërimit nga e kuqja në portokalli.
Irlanda ka njoftuar gjithashtu një lehtësim gradual të masave kufizuese për të lejuar hapjen e disa kompanive dhe bashkimet familjare përpara Krishtlindjeve.
Megjithëse përhapja e virusit po ngadalësohet për shkak të javëve të kufizimeve të rrepta, Evropa mbetet qendra pandemisë dhe ka parë më shumë infeksione të reja në shtatë ditët e fundit sesa Shtetet e Bashkuara.
Globalisht, më shumë se 1.4 milion vdekje dhe 61 milion raste të infeksionit me koronavirus janë regjistruar zyrtarisht, megjithëse numrat aktualë janë ende të panjohur pasi metodat e testimit dhe raportimit ndryshojnë shumë midis vendeve. /tesheshi.com/
