Komisioneri i Zgjerimit i BE Oliver Varhelyi beson se është e nevojshme të arrihet një marrëveshje që është “e pranueshme reciprokisht” dhe “e cila nuk përbën rrezik për vendet e tjera të rajonit” në dialogun midis Serbisë dhe Kosovës.
“Shkëmbimi i territoreve është në prapavijë, ajo që është parësore është që ne të kemi dy palë në tryezë të gatshëm për të biseduar dhe për të arritur një zgjidhje,” tha Varhelyi.
“Eshtë thelbësore që të dy palët të bien dakord për një zgjidhje që është e pranueshme reciprokisht dhe nuk përbën rrezik për vendet e tjera të rajonit. Kur të arrijmë në atë pikë, atëherë ne mund të konsiderojmë elemente të ndryshme të zgjidhjes,” thotë Varhelyi.
Komisioneri i Zgjerimit shton se ai pret një kontribut të madh nga Përfaqësuesi Special i BE Mirosllav Lajçak në nisjen e dialogut Serbi-Kosovë, si dhe në arritjen e një marrëveshjeje.
Nga ana tjetër, kreu i LDK-së Isa Mustafa, deklaroi se Kosova nuk duhet të ketë frikë nga dialogu me Serbinë dhe se zyrtarët e huaj dhe ndërmjetësit nuk janë ata që vendosin për kufijtë e Kosovës.
“As Grenell as Borrell dhe Lajçak nuk mund të ndryshojnë kufijtë ose të shkëmbejnë territore,” tha Mustafa në një postim në Facebook. /tesheshi.com/
