Kryetari i Komunës së veriut të Mitrovicës, Goran Rakiq, ka ndarë nga buxheti komunal 30 mijë euro për festimin e vitit të ri ortodoks që do mbahet në orët e vona të së mërkurës, pikërisht në veri.
Një burim i portalit tesheshi.com, që e bën të ditur këtë fakt, saktëson se në koncertin që do të mbahet në platonë e oborrit të ish-Shkollës së Mesme teknike të Mitrovicës, përveç këngëtarëve lokalë dhe atyre nga Serbia, do të marrë pjesë edhe një bend nga Rusia.
Sipas burimit, plot 20 mijë euro do të shkojnë për këngëtari serb nga Beogradi, Zhelko Joksimoviq, si dhe 10 mijë euro të tjera do t’i shkojnë në xhep kapos së krimit të veriut të Kosovës, Zvonko Veselinoviq.
Sepse, saktëson burimi, Veselinoviqi është mik shumë i ngushtë me Joksimovqin dhe menaxherin e tij, Bane Obradoviqin, e nga kjo, falë ndërhyrjes së tij, Joksimoviqi nga 50 mijë euro që ka kërkuar në fillim, ka shkuar në çmimin në 30 mijë euro.
Sigurisht që pa gjë nuk do mbetet as bendi rus “Kipelov” i cili do të përformojë me këngë kushtuar Kosovës si zemër të ortodoksizmit serb.
Por burimi nuk ka munduar të precizojë nëse këto para që janë ndarë nga buxheti i Komunës së veriut të Mitrovicës për koncertin fetar, do të jepen nga pjesa e taksapaguesve kosovare apo nga donacioni që ka dhënë Bashkimi Evropian në vlerë prej 2 milion euro.
Sigurisht që do ishte skandal nëse këto fonde do ishin të taksapaguesve kosovarë, pasi aty nuk do jetë thjesht një kremtim fetar, por një kremtim me frymë nacionaliste, ku Kosova do shenjtërohet si pjesë e pandashme e Serbisë.
Lidhur me këtë, shefi i grupit parlamentar të PDK-së në asamblenë komunale të veriut të Mitrovicës, Bashkim Cimili, i ka thënë portalit tesheshi.com me telefon se asambleistët shqiptarë nuk kanë asnjë informacion për ndarje e këtyre 30 mije euro për koncertin fetar.
“Kuvendi Komunal i Komunës së veriut të Mitrovicës mbledhjen e fundit e ka mbajtur më 10 dhjetor të vitit të kaluar dhe nuk është diskutuar farë kjo çështje” ka thënë Cimili . /tesheshi.com/
