Pas një arratisjeje për arsye mjekësore jashtë Shqipërisë, është vënë më së fundi në pranga ish-Kryeprokurori Adriatik Llalla.
Arrestimi i tij ka ndodhur në kryeqytetin italian, në Romë, pasi ishte shpallur në kërkim.
Gjykata e Posaçme e ka dënuar atë me 2 vite burg, si dhe 5 vjet heqje funksionesh publike, për “fshehje dhe mosdeklarim të pasurisë”.
Po ashtu, Gjykata vendosi edhe konfiskim të pasurive, gati 22 mijë metra katrorë truall dhe një apartament në Durrës.
Pos kësaj, prej shkurtit 2018, Llalla është pjesë e listës së zezë të Departamentit Amerikan të Shtetit, që i ka ndaluar hyrjen në SHBA, atij dhe familjarëve të tij.
Mësohet gjithashtu se Llalla kishte kërkuar azil politik në Itali disa kohë më parë dhe të premten e kaluar kishte seancën e radhës për të vlerësuar kërkesën e tij.
Ky është një proces në vijim, pasi drejtësia italiane po shqyrton dosjen e Llallës çuar nga SPAK në Romë.
Nëse pranohet kërkesa për azil politik, ai nuk mund të ekstradohet në Shqipëri pavarësisht vendimit të GJKKO-së.
Në të kundërt, do të ekstradohet për të vuajtur dënimin.
Adriatik Llalla ishte një produkt i dyshes Meta-Berisha në krye të akuzës shqiptare. Gjatë viteve që drejtoi Prokurorinë e Përgjithshme, edhe pse bëri ca paralajmërime deklarative, institucioni që drejtoi ishte ndër më të mefshët në vite për të goditur krimin dhe korrupsionin.
Pos kësaj, ai personalisht iu kundërvu Reformës në Drejtësi, duke u përplasur dhe më ish-ambasadorin Donald Lu. /tesheshi.com/
