Të thuash që është i shëndoshë është shumë pak. Bëhet fjalë për fëmijën më të rëndë të lindur në Indi, i cili peshon rreth 6.5 kilogramë. Fëmija gjigant është i fundit i nëntë fëmijëve të lindur në spitalin Orai të Indisë. Siç raporton Mirror, nëna e tij, 36-vjeçarja Firdous Khatun kishte lindur në shtëpi 8 fëmijët e parë, ndërsa këtë herë, duke parë edhe shqetësimet e gruas, 40 vjeçari Kadir Raza e shoqëroi bashkëshorten në spital.
Lindja zgjati vetëm 15 minuta dhe mjekët ngelen të mahnitur ndërsa panë se në jetë erdhi një fëmijë me të tilla përmasa, brenda kaq pak kohe.
Fëmijët e tjerë të gruas, e cila peshon 171 kilogramë, në momentin e lindjes nuk e kalonin peshën prej 4 kilogramësh.
Anjana Gupta, mjeku që asistoi në lindjen e të voglit u shpreh: “Është një fëmijë mjaft i shëndetshëm dhe i veçantë. Në 21 vite eksperiencë në mjekësi, nuk kisha parë asnjëherë një të sapolindur kaq të madh”.
Duhet thënë se i vogli ka superuar rekordin e fëmijës më të madh të lindur në Indi, i cili deri më tani ishte për masën 5.8 kilogramë./tesheshi.com/
