Manchester City u kurorëzua kampion i Evropës për herë të parë në histori, pasi mposhti Interin me rezultat 1:0 në finalen e madhe në Stamboll.
Skuadra e Pep Guardiolës u bë kampioni i 23-të i Evropës, i gjashti nga Anglia dhe njëkohësisht plotësuan trion, pasi fituan dhe Premier League dhe FA Cup.
Ishte në fakt një finale e dobët, me një pjesë të parë të vakët. Golin e vetëm e shënoi Rodri në minutën e 68-të.
Ashtu siç pritej, kampionët e Anglisë dominuan topin që në fillim, por pa shumë rreziqe, ndërsa skuadra italiane ngriti një bllok të fortë dhe të lëvizshëm që ishte e pamundur të depërtohej.
Në një lojë të tillë pamë vetëm një rast real në pjesën e parë, në minutën e 27-të me Erling Haaland kërcënoi, por portieri i Interit Andre Onana ishte i sigurt. Problem shtesë për City-n ishte edhe lëndimi i Kevin De Bruyne, i cili duhej të linte lojën në minutën e 36-të.
Goli vendimtar erdhi në minutën e 68-të kur Rodri shënoi një goditje të bukur me një top të kthyer të Bernardo Silva-s. Vetëm dy minuta më vonë, Interi mund të kishte barazuar, por Federico Dimarco tronditi vetëm traversën e jo rrjetën.
Kjo ishte finalja e dytë e Ligës së Kampionëve për “Qytetarët”, pasi në të parën në 2021-shin humbën përballë Chelsea 0:1. Nga ana tjetër, Interi regjistroi humbjen e tretë në finalen e tij të gjashtë. Dy humbjet e tjera i ka në vitet e largëta 1967 dhe 1972. Ndërsa tre herë kampionë të Evropës kanë dalë po në vitet e largëta 1964 dhe 1965, si dhe vonë në 2010.
Shtojmë gjithashtu se City u bë klubi i gjashtë anglez që fiton titullin kampion europian. Liverpool ka qenë skuadra më e mirë e “Kontinentit të Vjetër” gjashtë herë, Manchester United tre herë, Chelsea dhe Nottingham Forest nga dy herë dhe Aston Villa një herë.
Për menaxherin e City-t, Guardiolën, ky është titulli i tretë i Ligës së Kampionëve pas fitimit të dy të parëve me Barcelonën (2009, 2011). Eksperti italian Carlo Ancelotti mban rekordin me katër tituj të fituar, dy me Milanin (2003, 2007) dhe Real Madridin (2014, 2022). /tesheshi.com/
